Mamaliꞌ male lako Bola Puang Allataala
84
Dipatuju lako tomangpalunna tomakkelong. Nturuꞌ kelong Gitit. Kelongna batiꞌ Korah.2 Oo Puang Allataala to makuasa,
liwaꞌ mesannangan to ngenan Tanii mariꞌpih.
3 Gaja maliꞌnaꞌ
male lako tarampak Bola-Taꞌ,
gaja rionaꞌ makkelong mpakkelongan-Kiꞌ
Kitaꞌ Puang Allataala to tuo.
4 Oo Puang Allataala to makuasa,
Rajakuꞌ Puang Allataala to kusompa,
moi dena sola kalumpini manyaman messerang
nampatorro anakkana jio siandah ngenan pangkaroban.
5 Liwaꞌ ia masannang to totorro jio Bola-Taꞌ,
natuli mpakalaꞌbih-Kiꞌ mpukelong kelong pangpujian.
6 Masannang to torannuan kamawatangan-Taꞌ,
to gaja doang male deꞌ Buntu Sion mangngolo lako Kitaꞌ.
7 Ia ke lingkaii Lombok Baka,a
Napadenanni Puang Allataala mata wai jio joo lombok makase,
na pamula uran napubarakkaꞌ.
8 Samawatang-watangnai tonna mangnguju deꞌ Buntu Sion,
la mangngolo lako Puang Allataala.
9 Oo Puang Allataala to makuasa, metaꞌdanaꞌ Tapesaꞌdingngii passambajangkuꞌ.
Oo Puang Allataala to nasompa Yakub, Taparinawai tee petaꞌda tulungkuꞌ.
10 Oo Puang Allataala, metaꞌdanaꞌ Tabarakkaꞌii to rajakiꞌ,
lendungngii joo tomangkamo Tapilei.
11 Laꞌbi melo ia to torro sangngallo jio tarampak Bola-Taꞌ,
na ia to torro sangsaꞌbu allona jio ngenan laen.
Kulaꞌbiranmo to keꞌdeh mangjaga jio babangan Bola Puang Allataala to kusompa,
na ia to torro llan bolana togajaꞌ.
12 Puang Allataala Iamo nnarrangngi katuoantaꞌ,
Nalendungngikiꞌ susi perisai,
Napakamojaꞌkiꞌ, Napupenjajikiꞌ toditaratteꞌ.
Teꞌda Naanggeanni to kameloan
Naben lako totuo teꞌda caccana.
13 Oo Puang Allataala to makuasa,
gaja masannang to tomatappaꞌ lako Kitaꞌ.