Passambajang metaꞌda tulung nnewa ewa
83
Mesaꞌ kelongna Asaf.2 Oo Puang Allataala, danggiꞌ Takammaꞌ bang,
danggiꞌ Tamariꞌpih bang mangkoko kalepak.
3 Pesaꞌdingngiri sirongkami ewa-Taꞌ,
mangngewami to tongkabaꞌci-Kiꞌ.
4 Sikangkoloꞌi la nnewa ummaꞌ-Taꞌ,
nasitujuimi la rrarii to to-Talendungngi.
5 Nakua sipangkada, “Talanynyaꞌimi to bangsa Israel,
na teꞌdamo nadiingaran to sanganna.”
6 Nang mesaꞌ kadami
nasitujuimi la nnewa-Kiꞌ
7 to to-Edom sola to-Ismail,
to-Moab na to-Hagar,
8 to-Gebal, to-Amon na to-Amalek,
to-Filistin sola to-Tirus.
9 Moi to-Asyur merraumi lako ewa-Taꞌ,
la mbalii batiꞌna Lota nnewa-Kiꞌ.
10 b Tasessami tuu lako tonnewa-Kiꞌ susi to mangka Tapugauk lako to-Midian,
susi to Tasessan pangbarani Sisera sola Raja Yabin jio siandah Saꞌdan Kison,
11 to Tapatei jio En-Dor,
namenjaji pupuk lloppoi padang.
12 c Talanynyaꞌimi to tomangparentana ewataꞌ susi Raja Oreb na Raja Zeeb mangka Talanynyaꞌi,
susi too to Tapugauk lako Raja Zebah na Raja Salmuna tonna anuꞌ,
13 to mangkada nakua,
“Ikee, taalai to padang nanii torro Puang Allataala.”
14 Oo Puang Allataala to kusompa, pasisarambuanni susi icak joo tonnewa-Kiꞌ,
susi sowok natiaran angin.
15 Pasusii api ssumpun pangngalah
mangpamaꞌbong ratu deꞌ buntu.
16 Tapaulaꞌii angin baraꞌ-Taꞌ,
Tapasabakanni angin kalimpuru.
17 Oo Puang Allataala, akeꞌ natangdianggaꞌ,
dikua naakuii to kamakuasan-Taꞌ.
18 Akeꞌ nadipakasiriꞌ sola malajaꞌ tarruh,
nateꞌda tau nnanggaꞌi ratu lako matena,
19 dikua naissenni kumua Kitaꞌ mandara Puang Allataala to njaoanni sininna dewata,
Tongkuasai lino sola issinna.