Kelong ke wattu pangramean
81
Dipatuju lako tomangpalunna tomakkelong. Nturuꞌ kelong Gitit, naukiꞌ Asaf.2 Pakkelongan-Ni kelong pangpujian Puang Allataala to mbenkiꞌ kamawatangan.
Mario kamuꞌ mpakkelongan Puang Allataala to nasompa Yakub.
3 Makkelong kamuꞌ
mipasialai oni ballona cuꞌbekan, gambus na rebana.
4 a Pannonii to tarompeꞌ ke allo dinii mpugauk pangramean lako Puang Allataala
ke maneꞌ ollongngi to bulan sola sampei to bulan.
5 Ia joo pangramean mesaꞌ atoran lako to-Israel,
to Napattantu Puang Allataala to nasompa Yakub.
6 Napattantu Puang Allataala joo pangramean menjaji atoran lako to-Israel
tonna ewai Puang Allataala to to-Mesir.
Den gamara maniangga kusaꞌdingngi mangkada kumua,
7 “Mangkami Kuangkaꞌi to pamawa mabandaꞌ jao mai kamalaꞌmu,
Kulendokanmi to buriah mabandaꞌ jio mai limammu.
8 b Ia joo wattu mperasai kamuꞌ kamasussan, mimetaꞌda tulung,
Kupasalamaꞌ kamuꞌ.
Kupebali kamuꞌ llan mai saleuꞌ menggalugu, iamo na teꞌda mikita-Naꞌ.
Mangkamo kamuꞌ Kuuji jio kalimbuah Meriba.
9 Ee to-Israel, pesaꞌdingngii la Kupangngingaran kamuꞌ.
Ee ummaꞌ-Kuꞌ, madoangra kamuꞌka mpesaꞌdingngi-Naꞌ?
10 c Danggiꞌ naden dewatanna bangsa laen llan allaꞌmi,
danggiꞌ misompai.
11 Akuꞌra Puang Allataala to misompa
to ssolan kamuꞌ messun llan mai tana Mesir.
Petaꞌdai to sininna miparalluinna nang la Kuben kamuꞌ.
12 Apa ciaꞌi ummaꞌ-Kuꞌ mpesaꞌdingngi-Naꞌ,
ciaꞌi to to-Israel nturuꞌ-Naꞌ.
13 Iamo joo Kupupangngelohnai tattaꞌ membattuk,
akeꞌ nampueloh elohna.
14 Ia ke la dikua napesaꞌdingngi-Naꞌ ummaꞌ-Kuꞌ,
namadoang nturuꞌ parenta-Kuꞌ,
15 nang la taꞌpa Kupacokok to ewana
Kutaloii to tonnewai.
16 Ia to tongkabaꞌci-Naꞌ, la Kupacukku solohhi namasiriꞌ,
nadisessa tarruh teꞌda anggena.
17 Apa ia to ummaꞌ-Kuꞌ la Kubenni gandum kaminang melo la napukande,
Kupebarahhii canik pangngalah.”