Passambajang dikua nasalamaꞌ to to-Israel
80
Dipatuju lako tomangpalunna tomakkelong. Nturuꞌ kelong “Bunga bakung tanda saꞌbi”. Kelongna Asaf.2 a Oo Tomangrewana to-Israel, Tapesaꞌdingngii!
Kitaꞌmo mparakai batiꞌna Yusuf, to susi domba mangbuanan.
Kitaꞌ to cumadokko jao kerubb,
ratumi-Kiꞌ mpupangngarrang arrang kamalaꞌbiran-Taꞌ
3 lako suku Efraim, suku Benyamin
na suku Manasye.
Pangpekitanmi kamakuasan-Taꞌ,
ratumi-Kiꞌ mpasalamaꞌkan.
4 Oo Puang Allataala, pamanyaman poleꞌmi to katuoankiꞌ,
mamasemi-Kiꞌ ngkitakan, kisalamaꞌ.
5 Oo Puang Allataala to makuasa,
pirapara masainna la Tanii mabirih lako ummaꞌ-Taꞌ?
Moi kimassambajangmo lako Kitaꞌ, tattaꞌ-Kiꞌ magalli.
6 Tapebarahhikan kamaparrisan butung mpebarah kande,
na kabudanna wai matangkiꞌ butung kipuwai diisoꞌmi.
7 Tapupangngelohnai to bangsa siandahkiꞌ massiteꞌgeh ssialai tana manahkiꞌ,
napetawa-tawaikan ewakiꞌ.
8 Oo Puang Allataala to makuasa, pamanyaman poleꞌmi to katuoankiꞌ,
mamasemi-Kiꞌ ngkitakan, kisalamaꞌ.
9 Susi garontoꞌ anggoroꞌ to ummaꞌ-Taꞌ Tapalele jio mai tana Mesir,
Tatananni jio kampongna to bangsa mangka Taulaꞌi.
10 Tapasadianni padang to ummaꞌ-Taꞌ,
nanii torro susi garontoꞌ anggoroꞌ tuo mewwakaꞌ mandalan,
namerrorok llan sininna kampong.
11 Na nnonganni buntu,
na ia to tangkena ssamboi kaju arasc simawatang.
12 Na merrorok to tangkena ratu lako Tasik Tangnga,
na mengkacocok ratu lako Saꞌdan Efrat.
13 Oo Puang Allataala, ciapari Taroꞌpokanni to rompo kampongna ummaꞌ-Taꞌ,
arannai sininna toliu lalan mentama ssilaꞌtukki asseleꞌ buanna?
14 Na ia to ewakiꞌ susii bai lampung mentama kampong
massumben namanggajaꞌ-gajaꞌ.
Susi tooi olok-olok masiaꞌ,
mentama mangkande.
15-16 Oo Puang Allataala to makuasa, Takitamokan jao mai suruga.
Parinawakan tee kamiꞌ ummaꞌ-Taꞌ,
to Tapatorro namawatang jio joo kampong.
Jolona susikan tananan anggoroꞌ to Tatanan
to Tapemawatangngi wakaꞌna.
17 Mangkami nalanynyaꞌi ewa to ummaꞌ-Taꞌ, butung to mbelahhi tananan anggoroꞌ nasumpunni.
Akeꞌ na kamagallian-Taꞌ llanynyaꞌii to ewa.
18 Dennaa upaꞌ na kuasan-Taꞌ llendungngii to tomangkamo Tapilei,
Tapemawatangngi joo to-Tapatujui lako kale-Taꞌ,
19 dikua nadanggiꞌ kipabokoꞌi-Kiꞌ penawa.
Parakaimi to katuoankiꞌ, kipakalaꞌbih-Kiꞌ.
20 Oo Puang Allataala to makuasa, pamanyaman poleꞌmi to katuoankiꞌ,
mamasemi-Kiꞌ ngkitakan, kisalamaꞌ.