Passambajang nadipasalamaꞌ to to-Israel jio mai tompandasai
79
1 a Kelongna Asaf.Oo Puang Allataala, ia to bangsa to tangssompa-Kiꞌ
natamaimi to tana manah-Taꞌ,
nancarepai Bola Malaꞌbih-Taꞌ
naroꞌpokanmi to kota Yerusalem.
2 Nasalai bangngi to batang rabukkuna kaunan-Taꞌ,
naratu to manuk-manuk ssialaii
napupangngelohnai joo to-Tapakamojaꞌ
nasiintai olok-olok masiaꞌ.
3 Natiballu susi wai to rarana ummaꞌ-Taꞌ natiampah silele llan kota Yerusalem,
na teꞌda tau llamunni.
4 Napetawa-tawaikan bangsa bali kampongkiꞌ,
nacapaꞌkan sola napelleꞌkan.
5 Oo Puang Allataala, pirapara masainna la Tanii ngkabirih tarruhkan,
na murruk susi api to kamangngimburuan-Taꞌ?
6 Tapasaumi to kamabirisan-Taꞌ
lako toteꞌda naissen-Kiꞌ,
lako sininna karajaan to ciaꞌ ssompa-Kiꞌ.
7 Nasabaꞌ butung cappuꞌmokan nakande tee kamiꞌ ummaꞌ-Taꞌ,
naancuruꞌi to kampong kinii torro.
8 Danggiꞌ Tapabalahhikan dosana tojolokiꞌ,
dennaa upaꞌ Tamadoiꞌ ngkamaseikan, sabaꞌ kaꞌtu rannumokan.
9 Oo Puang Allataala, Tomangpasalamaꞌkiꞌ Tatulungmokan,
Pasalamaꞌkan, Taaddampangankan jio mai sininna dosakiꞌ,
nadipakalaꞌbih to sangan-Taꞌ.
10 Danggiꞌ eloranni to bangsa tangssompa-Kiꞌ mangkada kumua,
“Umbomira to Puang Allataala nasompa nateꞌda Natulungngi?”
Akeꞌ kikitai ke Tapabalahhii
to tompatei kaunan-Taꞌ.
11 Pesaꞌdingngii sarrona to toditarungku,
to dipattantumo la dipatei,
Tapasalamaꞌi natattaꞌ tuo,
sabaꞌ makuasa-Kiꞌ.
12 Oo Puang Allataala, pabalahhimi manglokkon pempitu to pangcapaꞌna tuu lako bangsa lako Kitaꞌ.
13 Kimangsukkuruꞌ tarruh tee kamiꞌ ummaꞌ-Taꞌ to butung domba pangrewa-Taꞌ,
na la kipauan batiꞌkiꞌ sininna to Tapugauk malaꞌbih teꞌda anggena.