Puang Allataala sola ummaꞌ-Na
78
Kelong pangngajaranna Asaf.Ee kamuꞌ sangkampongkuꞌ, pesaꞌdingngii to pangpangngajahkuꞌ,
parinawai tee kadangkuꞌ.
2 a La mpaunaꞌ kada bulawan mpake pangpasusian,
la mpamanassanaꞌ karume to nang denmo tempon jiona mai,
3 to mangkamo kisaꞌding kiissenni,
to nacurita tojolotaꞌ.
4 Teꞌda kilambunianni tee kada lako anakkiꞌ,
apa nang la kicurita lako sininna batiꞌkiꞌ
to kamakuasan-Na Puang Allataala sola sininna jaman-Na,
na apa to Napugauk liwaꞌ mejangngaran.
5 Nabenni lako to-Israel to atoran-Na,
Nabenni batiꞌna Yakub to parenta-Na.
Nasuai to tojolotaꞌ
mpangpangngajaranni lako batiꞌna,
6 dikua naissenni to batiꞌ maneꞌ la jaji,
na ia to batiꞌna poleꞌ o ncurita oi lako batiꞌna,
7 dikua namatappaꞌ lako Puang Allataala,
natuli mpugaukki to parenta-Na
na danggiꞌ nakalupaii to sininna Napugauk Puang Allataala.
8 Danggiꞌ nasusi tojolona tuli mangngewa
naciaꞌ nturuꞌ parenta-Na Puang Allataala,
teꞌda namattantu kamatapparanna lako Puang Allataala.
9 Ia tonna tee, moi na macca mangpana to tentarana to-Efraim,
apa ianna parari male unai mpalaian kalena.
10 Na teꞌda napugaukki to janjin-Na Puang Allataala,
naciaꞌ nturuꞌi to atoran-Na.
11 Napabokoꞌi penawa to Napugauk Puang Allataala
na teꞌdamo naingaranni to panggaukan mejangngaran to mangka Napakitanni.
12 bJio olo tojolona Nanii Puang Allataala mpugaukki to tanda mejangngaran
tonna jiong tana Mesir padang lappahna Zoan.
13 c Napatipangduai to wai tasik, Napalambanni
Napatindakki joo wai tasik susi rinding.
14 d Najoloanni Puang Allataala mpake saleuꞌ ke lumingka alloi,
Nalalananni arrang api ke bongii.
15 e Napiakki to buntu batu jio padang pallawangan
natitollo-tollo to wai liwaꞌ buda, naisoꞌi
16 Napasunni Puang Allataala to wai llan mai buntu batu,
nalolong susi wai saꞌdan.
17 Apa mpugauk tarruhhi dosa to tojolona jio padang makase,
nnewai Puang Allataala to njaoanni sininna dewata.
18 fNaanggaiꞌi ncobai Puang Allataala,
nampetaꞌda kande to nakadoangngi.
19 Namangcapaꞌ nakua,
“Baꞌtu la Nakullei Puang Allataala mbenkiꞌ kande, ntee padang pallawangan?
20 Tongan kumua Nasambakkii to buntu batu
natitollo-tollo to wai nalolong susi wai saꞌdan,
apa waꞌding toorika la mpasadiankiꞌ kande
baꞌtu mbenkiꞌ jukuꞌ tee kitaꞌ ummaꞌ-Na?”
21 Iamo Nagaja galli Puang Allataala tonna saꞌdingngi joo kada,
Naewai to ummaꞌ-Na mpake api.
Nasamaparrang-parrang-Na magalli,
22 sabaꞌ ia to to-Israel teꞌda namatappaꞌ lako Puang Allataala,
teꞌda nakatappaꞌi kumua makuasa Puang Allataala mpasalamaꞌi.
23 Apa moi nasusi joo, Nasuai Puang Allataala to langiꞌ
natimbakanni to sininna salliꞌna.
24 g Napalaoanni Puang Allataala kande jao mai langiꞌ
to disanga mannah la naputuo.
25 Liwaꞌ buda kande to Nabenni Puang Allataala,
kande malaekaꞌmo nakande.
26 Napupangngiriꞌi Puang Allataala to angin jio mai kadellekan,
na kamakuasan-Na mpupangngiriꞌ angin tingngo lloꞌ mai.
27-29 Napalaoanni manuk-manuk liwaꞌ buda susi kassiꞌ jio randan tasik.
Napolloranni jio mengguririkkina sininna tenda,
to nanii torro ummaꞌ-Na.
Nakasaraii, nakande jukuꞌ sabarahna,
sabaꞌ Nabenni Puang Allataala to apa nakadoangngi.
30 Apa moi nabarahmo teꞌdapa nasau penawanna.
Iamo nallan unapa angaꞌna to kande,
31 Nakagallii Puang Allataala to ummaꞌ-Na.
Napateii to kallolona sola tomawatangna to-Israel.
32 Moi nasusi joo, tattaꞌi to ummaꞌ-Na mpugauk dosa,
na teꞌda nakatappaꞌi to tanda mejangngaran Napugauk Puang Allataala.
33 Iamo naratu lako cappaꞌ katuoanna teꞌda buaꞌna,
angge tuona malajaꞌ manda naperasai.
34 Den opi Napatei Puang Allataala,
maneꞌ ori menassan to totuo unapa
namatappaꞌ poleꞌ lako Puang Allataala,
35 namangngingaran kumua Puang Allataalara susi buntu batu dinii mentilendung,
na Puang Allataalara to njaoanni sininna dewata mpasalamaꞌi.
36 Apa nnuragari Puang Allataala,
nateꞌda lalo natongan to kadanna.
37 i Teꞌda natattaꞌ menturuꞌ lako Puang Allataala
na teꞌda natattaꞌ mpugauk janjin-Na Puang Allataala.
38 Apa liwaꞌ mamase to Puang Allataala,
Naaddampanganni to ummaꞌ-Na
na teꞌda Nalanynyaꞌii.
Pembuda-buda-I ntaꞌtan kamagallian-Na,
na teꞌda Napatosso ngasanni to kamabirisan-Na.
39 Naingaranni kumua, ia to ummaꞌ-Na teꞌda nalatuo tarruh llan lino,
susi mandari angin liu lalan mangngiriꞌ.
40 Teꞌda pajana mangngewa
na mpaꞌdikki penawan-Na Puang Allataala
tonna jio padang pallawangan.
41 Nadaduꞌ-daduꞌ bang ncobai Puang Allataala
na mpaꞌdikki penawan-Na Tomalaꞌbih to nasompa to-Israel.
42 Teꞌdamo naingaranni to kamakuasan-Na Puang Allataala,
ton-Nalaꞌparanni jio mai ewana,
43 tonna mpugauk pira-pira tanda mejangngaran jiong tana Mesir
jio padang lappahna Zoan.
44 j Sininna wai saꞌdan sola wai salu Napupenjaji rara,
arannai tangdisaramo nnisoꞌi.
45 k Naparatuanni buda laliꞌ ncuccuꞌ rarana to-Mesir,
sola tokkoꞌ nggajaꞌ-gajaꞌ padangna.
46 l Naparatuanni ulliꞌ ngkande asseleꞌ baraꞌbahna.
Naparatuanni batik ncappuꞌii sininna tanananna.
47 m Naparatuanni uran membatu ssolangan garontoꞌ anggoroꞌna,
na salju ssamboi garontoꞌ ara nasimatean.
48 Naeloranni Puang Allataala to patuoanna nasolangan uran membatu,
nataꞌpaii kilaꞌ sapinna sola dombana.
49 Napatossoi to kamabirisan-Na, kamagallian-Na,
sola kamareꞌdekan-Na, na kamakani-kanian-Na.
naratu to sanglengkoan malaekaꞌ mbawa cilaka.
50 Takkaliwaꞌ kamabirisan-Na,
teꞌdamo nakacirinnai Puang Allataala to sungaꞌna to-Mesir,
Naparatuanni saki palelean, nasimatean.
51 n Napatei ngasanni Puang Allataala to anak pamungah muane to-Mesir
to dipattuan jio sininna bola to-Mesir.o
52 p Namaneꞌ ssolanni to ummaꞌ-Na messun llan mai tana Mesir susi domba mangbaloleꞌ,
Napannola jioi padang pallawangan.
53 q Manyamanni na teꞌda namalajaꞌ to ummaꞌ-Na Puang Allataala llan kalingkanna,
sabaꞌ Nasolanni Puang Allataala,
apa ia to ewana ditallananni doꞌ tasik.
54 r Nasolanni to ummaꞌ-Na lako tana malaꞌbih-Na,
tee padang membuntunna, to Naala mpake kuasan-Na.
55 s Naulaꞌii to totorro jio,
Namaneꞌ ntawanni ummaꞌ-Na joo tana manah mpake pesukaꞌ napada mpumanahhi,
na sininna suku to-Israel pada ntorroi tendana ewana.
56 t Apa ia to ummaꞌ-Na mangngewai na ncobai Puang Allataala to njaoanni sininna dewata,
na teꞌda naturuꞌi to parenta-Na.
57 Mpabokoꞌii penawa Puang Allataala susi tojolona,
teꞌda nadikatappaꞌi susii mata pana tangmaruruh malena.
58 Napumapaꞌdik penawan-Na Puang Allataala to ngenan passompanna jao membuntunna nanii massompa lako dewata,
Napangngimburuii Puang Allataala to tau-tau dewatanna.
59 Ia ngasanmo joo to Napumabirih Puang Allataala,
iamo Naciaꞌ lalomo ntarimai to to-Israel.
60 u Nasalaimi Puang Allataala to tenda-Na jio kota Silo,
to Nanii torro llan allaꞌ tolino.
61 v Napupangngelohnai to Patti Basse tanda kamalaꞌbiran-Na
naala ewa.
62 Napupangngelohnai to ummaꞌ-Na napaꞌdangngi ewana,
sabaꞌ gaja galli-I lako taun-Na.
63 Ia to kallolona cappuꞌmi mate parari,
na teꞌdamo la nasibalian to anaꞌdara, arannai teꞌdamo kelong tobotting disaꞌding.
64 Purami mate to imang nakanna paꞌdang,
na teꞌda nadieloran to baine matemo muanena mbating.
65 Nataꞌpa mangngingaran Puang Allataala butung to tomaneꞌ miꞌcok mammaꞌ,
susi pangbarani malango mangngisoꞌ anggoroꞌ, namangngingaran.
66 Napasorong bokoꞌi Puang Allataala to ewa-Na,
namemmasiriꞌ teꞌda anggena.
67 Ciaꞌ-Mi ntarima batiꞌna Yusuf,
teꞌdamo Napileii to suku Efraimw.
68 Apa iara Napilei to batiꞌna Yehuda,
na Buntu Sionx to Nakabudai.
69 Mpakeꞌdeh-Hi Bola malaꞌbih-Na, susi maballona suruga.
Ia joo bola malaꞌbih-Na Nakabuaꞌ mawatang tangtigesuꞌ teꞌda anggena, susi lino to Nakabuaꞌ.
70 y Napileii to Raja Daud kaunan-Na,
Natambaii tonna mukkun mangrewa domba,
71 jio mai to nanii mangrewa domba mangpacucupa,
la mparakai to-Israel ummaꞌ-Na Puang Allataala.
72 Macanning atinna Raja Daud mparakai to-Israel,
napatuju rampaꞌi mpake kamaccanna.