Nningaran to sininna Napugauk Puang Allataala tonna anuꞌ
77
Dipatuju lako tomangpalunna tomakkelong. Nturuꞌ Yedutun. Kelongna Asaf.2 Metambanaꞌ metaꞌda tulung lako Puang Allataala,
metambanaꞌ metaꞌda tulung, dikua Napesaꞌdingnginaꞌ.
3 Ia tongkumasussa, massambajangnaꞌ lako Puang Allataala.
Tangmekaboꞌjoꞌnaꞌ nnangkaꞌ limangkuꞌ massambajang siupuh bongi,
apa teꞌda unapa kumatana.
4 Ia ke nningarannaꞌ Puang Allataala, sumarronaꞌ.
Ia ke mangnawa-nawanaꞌ, samandalan-dalanna kamasussankuꞌ.
5 Oo Puang Allataala, Kitaꞌ mpatangmammaꞌnaꞌ ke bongi,
natangrapaꞌ penawangkuꞌ arannai teꞌda kuissen to la kupau.
6 Kuingaran to wattu kamasannangan tonna anuꞌ,
taun masainmo pura dibokoꞌi.
7 Kuingaranni to kelong kupukelong ke bongii, kumangnawa-nawa,
kumekutana llan penawangkuꞌ kukua,
8 “La ciaꞌ tarruhmiraka Puang Allataala mangtulung?
Nang la teꞌda lalomoraka mamase-Na?
9 Ciaꞌmiraka mpakamojaꞌkiꞌ?
Pajamiraka mpugaukki to janjin-Na ratu lako batiꞌtaꞌ?
10 Tangnaingaranmiraka Puang Allataala mangpakamojaꞌ?
Mabirih tarruhmiraka na teꞌdamo mamase-Na?”
11 Kukuamo mangkada,
“Ia tee to napumapaꞌdik penawangkuꞌ kumua,
teꞌdamo takitai to kuasan-Na Puang Allataala to njaoanni sininna dewata,
susi to Napugauk tonna anuꞌ.”
12 Oo Puang Allataala, la kuingaran to sininna Tapugauk,
nang la kupallan penawa to tanda mejangngaran to Tapugauk tonna anuꞌ.
13 La kupikkiriꞌ simesaꞌ to sininna Tapugauk,
kunawa-nawai to mejangngaranna to Tapugauk tempon jiona mai.
14 Oo Puang Allataala to kisompa, melo sininna to Tapugauk.
Teꞌda dewata la ncauꞌ kamakuasan-Taꞌ.
15 Kitaꞌmo Puang Allataala to mpugauk tanda mejangngaran,
mangkami Tapamanassa to kuasan-Taꞌ lako sininna bangsa.
16 Kamawatangan-Taꞌ Talaꞌbakkia to ummaꞌ-Taꞌ
Tapasalamaꞌi to batiꞌna Yakub na batiꞌna Yusuf.
17 Oo Puang Allataala, ia tonna kita-Kiꞌ wai malajaꞌi,
moi wai tasik maluah mbeꞌbeh too ngkita kamakuasan-Taꞌ.
18 Saleuꞌ mpupembanasa uran, galugu gumalugu.
Umbopi ia to palepaꞌ cullepaꞌ-lepaꞌ.
19 Oni galugun-Taꞌ menggalugu, melolin-lolin llan angin baraꞌ,
nacumbiaꞌ-biaꞌ to palepaꞌ nnarrangngi lino,
nanino, natiroge to lino.
20 Lumingka-Kiꞌ jao ombaꞌ,
llingkai tasik maluah, apa teꞌda napajan to bate-Taꞌ.
21 Mangkami-Kiꞌ njoloan ummaꞌ-Taꞌ susi tomangrewa njoloan pangrewana,
mpake Nabi Musa sola Harun mpatujui lako lalan.