Puang Allataala rraꞌtah kara-karana sininna bangsa
76
Dipatuju lako tomangpalunna tomakkelong. Kelongna Asaf dipannonian cuꞌbekan.2 Kaissenan Puang Allataala jio tana Yehuda,
namalaꞌbih to sangan-Na jio tana Israel.
3 Jio kota Yerusalem Nanii torro,
jao Buntu Sion nanii bola-Na.
4 Jio Nanii nnancuruꞌ ngasanni to parewa napake ewa parari,
iamo to sininna pana cumbiaꞌ-biaꞌ, perisai sola paꞌdang.
5 Kitaꞌ Puang Allataala to gaja mawatang na malaꞌbih.
Moi buntu to nang denmo mellao jiona mai Tajaoannipa to kamawatanganna.
6 Mangkami diala parewana tobarani,
na teꞌdamo kamawatanganna.
Silentenanmi,
na teꞌdamo nalamiꞌcok.
7 Oo Puang Allataala to nasompa Yakub, silontinanni mate to nyarang sola tossakeii,
ton-Tagarraꞌi.
8 Gaja nakalajaꞌ-Kiꞌ tau.
Indara la ngkullei mangpatanan jio olo-Taꞌ ke magalli-Kiꞌ?
9 Jao mai suruga Tanii mpaui to karaꞌtasan-Taꞌ.
Mangpakippii to tolino najangngah,
10 ton-Tamangsessa,
la mpasalamaꞌ to dipakario-rio llan lino.
11 Ia to kamabirisanna tolino Tapupenjaji kamalaꞌbiran-Taꞌ
Tapapajai to kamagallianna tolino.
12 Mangtinjaꞌ kamuꞌ mipugaukki to tinjaꞌmi lako Puang Allataala to misompa.
Akeꞌ na sininna bali kampongmi la mbawa too passompa lako Puang Allataala to dikalajaꞌ-dikasiriꞌ.
13 Puang Allataala ntaꞌdei kamatampoanna tomangparenta,
nakalajaꞌ-I sininna raja llan lino.