Puang Allataala maruruh mangraꞌtah
75
Dipatuju lako tomangpalunna tomakkelong. Nturuꞌ kelong “Danggiꞌ manglanynyaꞌi”. Kelongna Asaf.2 Oo Puang Allataala, mangsukkuruꞌkan.
Mangsukkuruꞌkan, sabaꞌ mandoppiꞌ-Kiꞌ lako kamiꞌ,
napakarebai tau to sininna Tapugauk
to liwaꞌ mejangngaran.
3 Mangkada-I Puang Allataala Nakua,
“Akuꞌ-akuꞌ to la rraꞌtah kara-karana tolino situruꞌ katonganan,
ke nadeteꞌmi to wattu Kupattantu.
4 Moi natiroge tee lino sola issinna,
Akuꞌ mpemawatangngii to ariri lino.
5 Kumangkada lako toborro,
Kukua, ‘Danggiꞌ borro mangkada.’
Na lako togajaꞌ Kukua,
‘Danggiꞌ mpumatampo kamawatanganmu.
6 Danggiꞌ majao penawa sabaꞌ kamawatanganmu,
baꞌtu mangkada matampo.’ ”
7 Nasabaꞌ ia to rraꞌtah kara-kara, tangngia tolino,
teꞌda too natimbaꞌ jio mai appaꞌ sulapaꞌna lino.
8 Apa Puang Allataala Ia to la rraꞌtah kara-karana tolino,
Napamajiongngi to mesaꞌ tau, Napaendek tukaꞌi to laenna.
9 Nasabaꞌ ia to kamabirisan-Na Puang Allataala,
susi anggoroꞌ masarruꞌ llan isotan natoe liman-Na.
Natolloi Puang Allataala tama angaꞌna sininna togajaꞌ llan lino
na nang la nacappuꞌi naisoꞌ moi karopahna.
10 Apa ia tee akuꞌ, la tattaꞌnaꞌ mpangpeissenanni to Napugauk Puang Allataala to nasompa Yakub,
kupakalaꞌbih-Hi mpukelong pangpujian.
11 Ia to tomakassing la samawatang-watangna,
apa ia to togajaꞌ la dialai kamawatanganna.