Kelong bating, sabaꞌ diroꞌpokanmi to Bola Puang Allataala
74
Kelong pangpangngajahna Asaf.Oo Puang Allataala, la Tasalai tarruhmorakanka?
Ciapari Tamabirih tarruh lako kamiꞌ ummaꞌ-Taꞌ?
2 Ingaranni ummaꞌ-Taꞌ to Tapileimo mellao jiona mai,
to mangka Talaꞌbak, Tapupenjajii ummaꞌ-Taꞌ.
Ingaranni to Buntu Sion to Tanii mariꞌpih.
3 Lingkairi to Bola-Taꞌ to roꞌpokmo na disalaimo
Takitai to sininna mangka naancuruꞌ ewa.
4 Ia joo wattu, siarrakanni to ewa-Taꞌ jio Bola-Taꞌ
na mpakeꞌdeh bandera jio, tandana kumua patalomi.
5 Ratui to ewa susi to tolantaꞌbang kaju,
mpematandei limanna ntoe wasena.
6 Mpake wase sola palu-palu
naancuruꞌi to kaju diballo-balloi pangngukiꞌ llan Bola-Taꞌ.
7 Nacarepaimi ewa-Taꞌ to ngenan dinii ssompa-Kiꞌ,
nasumpunni joo Bola-Taꞌ arannai sirante padang.
8 Napada mangkada llan penawanna kumua,
“Akeꞌ tapandasa ngasanni to ummaꞌ-Na Puang Allataala!”
Nasumpun ngasanmi to ngenan dinii ssompa-Kiꞌ llan tee kampong.
9 Teꞌdamo tanda mejangngaran dikita na teꞌda toomo nabi
na moi mesaꞌ tau teꞌda nnissenni pira masainna la jaji susi tee.
10 Oo Puang Allataala, pirapara masainna to ewa-Taꞌ ncapaꞌ-Kiꞌ?
La tarruh-tarruh bangmiraka mpau gajaꞌ sangan-Taꞌ?
11 Ciapari Taciaꞌmo ntulungkan?
Ciapari Takita-kita bangkan?
12 Oo Puang Allataala, mellao jiona mai, nang Kitaꞌmo Rajakuꞌ,
Kitaꞌ mpasalamaꞌi to bangsakuꞌ.
13 a Kamakuasan-Taꞌ natipangdua to wai tasik,
Taancuruꞌi to sininna ulu ulah naga jiong tasik.
14 b Kitaꞌ nnicak-icakki to ulu Lewiatan,
Tabenni olok-olok jio padang makase nakandei.
15 Kitaꞌ mpalolong wai kalimbuah sola salu,
Tapamakasei to saꞌdan.
16 Kitaꞌ mpattantui to wattu masiang na bongi,
Tapattantui to ngenan mataallo sola bulan.
17 Kitaꞌ mpattantui to randan tasik na gantanan,
Tapadenni to wattu pebarrangan sola wattu peuranan.
18 Oo Puang Allataala, ingaranni, takkaliwaꞌmi to ewa-Taꞌ ncapaꞌ-Kiꞌ,
napau gajaꞌ-Kiꞌ to tobattuk to teꞌda naanggaꞌ-Kiꞌ.
19 Danggiꞌ eloranni to tomaparrang llanynyaꞌi ummaꞌ-Taꞌ to tangpakulle.
Danggiꞌ Takalupai katuoanna ummaꞌ-Taꞌ to dipandasa tarruh.
20 Ingaranni to janjin-Taꞌ lako kamiꞌ,
sabaꞌ buda to ngenan kabunian llan tee kampong,
nanii tomasaꞌgaꞌ mpugauk kagajatan.
21 Danggiꞌ eloranni to todipandasa dipakasiriꞌ.
Dennaa upaꞌ na ia to tomapaꞌdik sola tokaasi-asi mpakalaꞌbih-Kiꞌ.
22 Oo Puang Allataala, pangngewanni to kara-kara-Taꞌ,
Taewami to ewa-Taꞌ,
sabaꞌ allo-allomi-Kiꞌ nacapaꞌ tobattuk.
23 Danggiꞌ tangningaranni to kadanna ewa-Taꞌ to sipetamba-tamban,
nasamarongka-rongkana nnewa-Kiꞌ.