Suraꞌ mangpentallunna:
Zabur 73–89
Nang la dilanynyaꞌi to tomangpanggaukan gajaꞌ
73
Kelongna Asaf.Manassa nang melo penawanna Puang Allataala lako ummaꞌ-Na,
lako to mapaccing penawanna.
2 Apa ia tee akuꞌ, pussak penawangkuꞌ,
garapamora kusala lalan.
3 Nasabaꞌ mangngimburunaꞌ ngkita sininna tomatampo,
mangngimburunaꞌ ngkita togajaꞌ to melo bang asseleꞌna.
4 Teꞌda ia namasaki,
tattaꞌ mawatang kalena na macommoꞌ.
5 Teꞌda namperasai sussa,
teꞌda naratuii parriꞌ susi tau laen.
6 Iamo nasusi to kumua napuraraꞌ to kamatampoan,
na butung napukuliꞌmi to kamasaꞌgaran.
7 Kagajatan manda llan penawanna,
naparri-parri mpugauk akkatta gajaꞌna.
8 Ia manda napugauk to mangcapaꞌ, na ngkada-kadai tau,
liwaꞌ matampo mangkada la mangpandasa.
9 Ncapaꞌi Puang Allataala jao suruga,
naliwaꞌ mangkada matampo lako padanna rupa tau,
10 arannai buda ummaꞌ-Na Puang Allataala menturuꞌ lako,
na iamora napesaꞌdingngi ke mangkadai.
11 Nakua mangkada to tomatampo,
“Teꞌdara Naissenni Puang Allataala to tapugauk.”
Namangpikkiriꞌ kumua ia to Puang Allataala to njaoanni sininna dewata teꞌda paissen-Na.
12 Susimi joo to togajaꞌ,
masannang bang katuoanna
na sakerangngan-rangnganna to kasugiranna.
13 Teꞌda buaꞌna kujagai tarruh to kamapaccingan penawangkuꞌ,
teꞌda buaꞌna kupemabelai to kalekuꞌ jio mai dosa.
14 Nasabaꞌ allo-allonaꞌ maparriꞌ butung tomabusung,
kutuli disessa ke makaleꞌi.
15 Teꞌda akuꞌ kumangkada susi tomatampo kumua, “Teꞌda nakitakan Puang Allataala.”
Ia ke mangkadanaꞌ susi joo nnuragamoꞌ sininna ummaꞌ-Taꞌ.
16 Apa ia tongkupengkulleii la nnissenni matumbai na melo bang katuoanna to tomatampo,
liwaꞌ masussa kupahang,
17 arannai mentamanaꞌ Bola malaꞌbih-Na Puang Allataala,
kumaneꞌ nnissenni to la jaji lako to tomangpanggaukan gajaꞌ undinna dau.
18 Sitonganna butung Tapajioi lalan malecuꞌ,
Tapupangngelohnai melolin, namasolang.
19 Sangkappidian matara namasolang,
naliwaꞌ maparriꞌ to cappaꞌ katuoanna.
20 Oo Puang Allataala, susimi joo ke Tasessai,
taꞌpa lanynyaꞌi, nateꞌdamo nadiingaran.
Susii tindo tangdiingaran ke miꞌcokmikiꞌ.
21 Ia ke makani-kaninaꞌ,
kumapaꞌdik penawa susi to ditossok-tossok atekuꞌ,
22 bangoꞌnaꞌ na teꞌda kumapahang,
susiraꞌ olok-olok jio olo-Taꞌ.
23 Apa tattaꞌnaꞌ mandoppiꞌ lako Kitaꞌ,
Tatoei to limangkuꞌ.
24 Kitaꞌ mpatujunaꞌ Tapakaingaꞌnaꞌ,
Tamaneꞌ ssolannaꞌ tama ngenan kamalaꞌbiran.
25 Indara kuampui laenna jao suruga? Kitaꞌ mandara.
Teꞌda laenna kukamaliꞌ llan lino, Kitaꞌ mandara.
26 Oo Puang Allataala, moi namalamma batang kalekuꞌ sola penawangkuꞌ,
apa Kitaꞌmo kamawatangankuꞌ,
na Kitaꞌmo Puang Allataala to kusompa
to kupumanah teꞌda anggena.
27 Inda-inda to mpabokoꞌi-Kiꞌ penawa nang la masolang.
Talanynyaꞌi ngasan to toteꞌda natattaꞌ matappaꞌ lako Kitaꞌ.
28 Apa ia ke akuꞌ, liwaꞌ kukabudai to mandoppiꞌ lako Puang Allataala.
Puang Allataala to kusompa kunii mentilendung,
kuwaꞌding tattaꞌ mpangpeissenanni to sininna Napugauk.