Mpassambajangan raja
72
Kelongna Sulaiman.Oo Puang Allataala, patujui atoran-Taꞌ to raja,
ajahhii namaruruh mangraꞌtah susi Kitaꞌ.
2 Dennaa upaꞌ naraꞌtahhi to kara-karana ummaꞌ-Taꞌ situruꞌ atoran,
namaruruh lako to dipandasa.
3 Dennaa upaꞌ na ia tee kampongkiꞌ buda asseleꞌna,
napumasannangngi tobuda,
na teꞌda tau dipasilaenan llan kampong.
4 Dennaa upaꞌ napangkadanni raja to todipandasa
natulungngi to tokaasi-asi,
naancuruꞌi to tompandasa bang padanna rupa tau.
5 Dennaa upaꞌ namalambeh sungaꞌ to raja,
nasiturunannii mangparenta pada masainna den mata allo sola bulan.
6 Dennaa upaꞌ na ia to kaparentanna raja napumelo tobuda
susi uran mbosokki reu,
susi uran rambak llimbongngi padang.
7 Dennaa upaꞌ na pada masainna mangparenta,
la sabuda-budanna tau mpugauk kamarurusan,
nasamasai-sainna mangparenta,
la samasannang-sannangna to tobuda.
8 a Dennaa upaꞌ na memmaluah to kaparentanna pamula jio mai tasik jio kadellekan ratu tama tasik llan kalambunan,
memmalando pamula jio mai randan Saꞌdan Efrat ratu lako cappaꞌ lino.
9 Dennaa upaꞌ na ia to totorro jio padang makase ratu mengguntuꞌ jio olona raja,
na ia to ewana sujuꞌ ratu doꞌ litak.
10 Dennaa upaꞌ na ia to rajana to-Tarsis sola totorro jio pulau,
la mbawa passompa lako raja,
na ia to rajana to-Arab sola Etiopia,
ratu mbajah sima kaditaloanna.
11 Dennaa upaꞌ na sininna raja laenna la sujuꞌ jio olona,
na sininna bangsa la napukaunan.
12 Iamo raja la llaꞌparan to todipandasa to teꞌda tau ntulungngi,
naparinawai to tokaasi-asi metamba metaꞌda tulung.
13 La nakamasei to tomakario-rio sola totangpakulle
napasalamaꞌi.
14 Nalaꞌparanni to tokaidaꞌ-idaꞌ sola todipandasa jio mai kuasanna tompandasai,
sabaꞌ nakita raja kumua gaja keanggaꞌ tuu lako tau.
15 Dennaa upaꞌ na malambeh sungaꞌ to raja.
Dennaa upaꞌ na dipassompan lako raja to bulawan jio mai Arab.
Dennaa upaꞌ natattaꞌ to tobuda mpellao doangan raja,
na allo-allo dibarakkaꞌi.
16 Dennaa upaꞌ na buda asseleꞌ gandum llan sininna kampongtaꞌ,
na manglulun-lulun jao buntu susi ombaꞌ jiong tasik.
Dennaa upaꞌ na maloppo to padang susi maloppona Buntu Libanon,
na ia to tau llan kampong sabuda-budanna susi reu ssamboi padang.
17 Dennaa upaꞌ na dipau tarruh to sanganna raja,
na kaissenan tarruh, teꞌda anggena.
Dennaa upaꞌ na sininna bangsa metaꞌda nadibarakkaꞌi susi raja,
na sininna bangsa mpaui kumua tomaupaꞌ to raja.
18 Dipakalaꞌbih to Puang Allataala to nasompa to-Israel.
Ia mandara mpugauk panggaukan mejangngaran.
19 Dipakalaꞌbih to sanga malaꞌbih-Na teꞌda anggena.
Dennaa upaꞌ na ia to kamalaꞌbiran-Na silele llan lino.
Jajimi susi joo. Amin.
20 Angge nteemi to sininna passambajangna Raja Daud, anakkana Isai.