Passambajang ke matuamikiꞌ
71
Oo Puang Allataala, lako Kitaꞌ kunii mentilendung,danggiꞌ lalo Taelorannaꞌ dipakasiriꞌ.
2 Tulungnaꞌ, sabaꞌ maruruh-Kiꞌ,
pesaꞌdingnginaꞌ Tapasalamaꞌnaꞌ.
3 Lendungnginaꞌ, butung buntu batu
kunii manyaman mentiongan
to tuli kunii ratu mentilendung.
Tapattantumi la mpasalamaꞌnaꞌ.
Kitaꞌmo kupubuntu batu,
Kitaꞌ kupubenteng mawatang
kunii mentilendung kusalamaꞌ.
4 Oo Puang Allataala to kusompa, laꞌparannaꞌ jio mai togajaꞌ,
jio mai kuasanna tomasarruꞌ na masaꞌgaꞌ,
5 sabaꞌ Kitaꞌ kurannuan,
mangpamula jio mai malolleꞌkuꞌ Kitaꞌmo kukatappaꞌi.
6 Maneꞌ tiriknaꞌ llan baꞌtangna indokuꞌ ratu lako matuangkuꞌ,
Kitaꞌmo mparakainaꞌ.
Pangtulung-Taꞌ kujaji rampaꞌ,
iamo joo kutuli mpuji-Kiꞌ.
7 Ia to panggaukankuꞌ nakita tau naturuꞌi,
sabaꞌ Talendungnginaꞌ mpake kuasan-Taꞌ.
8 Allo-allonaꞌ mpakalaꞌbih-Kiꞌ,
kupangpeissenanni to kamalaꞌbiran-Taꞌ
pamula makaleꞌ ratu lako karuen.
9 Danggiꞌ Tasalainaꞌ llan kamatuankuꞌ,
danggiꞌ Takalupainaꞌ llan katangpakulleankuꞌ,
10 sabaꞌ napau gajaꞌnaꞌ ewakuꞌ,
namesaꞌ kada madoang la mpateinaꞌ.
11 Sipangkadai nakua, “Nasalaimi Puang Allataala,
tamale nnulaꞌi tajokkoi,
sabaꞌ teꞌdamo to mpasalamaꞌi.”
12 Oo Puang Allataala, danggiꞌ Tasalainaꞌ!
Oo Puang Allataala to kusompa, madoiꞌmi-Kiꞌ ntulungnaꞌ!
13 Akeꞌ na dipakasiriꞌ to tomangngatta la ncilakainaꞌ,
Akeꞌ nabucak sola teꞌda nadianggaꞌ.
Akeꞌ na dilanynyaꞌi.
14 Apa ia tee akuꞌ tattaꞌnaꞌ rrannuan-Kiꞌ,
kulaꞌbi masumangaꞌ mpakalaꞌbih-Kiꞌ.
15 La kucurita kumua maruruh penawan-Taꞌ.
Allo-allo la kupau kumua tuli mpasalamaꞌ-Kiꞌ ummaꞌ-Taꞌ
na sitonganna tangdipura rrekenni to kameloan Tapugauk.
16 Oo Puang Allataala to kusompa, kupuji panggaukan-Taꞌ to mawatang na makuasa,
kupangpeissenanni kumua Kitaꞌ manda to maruruh penawan-Taꞌ.
17 Oo Puang Allataala, Kitaꞌmo nnajahhinaꞌ sipamula malolleꞌkuꞌ,
na ratu lako too allo tattaꞌnaꞌ mpangpeissenanni to apa Tapugauk liwaꞌ mejangngaran.
18 Oo Puang Allataala, moi matuamoꞌ kukeubanmo
danggiꞌ Tasalainaꞌ,
kutattaꞌ mpangpeissenanni to kuasan-Taꞌ lako todenmo too allo,
natattaꞌ dicuritan to kamawatangan-Taꞌ lako sininna batiꞌ to maneꞌ la jaji.
19 Oo Puang Allataala, ia to kamarurusan-Taꞌ laꞌbi matande na langiꞌ,
naliwaꞌ mejangngaran to Tapugauk,
indara to la ssusian-Kiꞌ?
20 Taparatuannaꞌ buda kamaparrisan sola abalaꞌ,
apa Kitaꞌ bang una mpemawatangngi poleꞌnaꞌ,
Taruiꞌnaꞌ jiong mai lino tomate.
21 La Tapupenjajinaꞌ toliwaꞌ dianggaꞌ jio olona tolino,
na Kitaꞌ too la mpakatana poleꞌnaꞌ.
22 Oo Puang Allataala to kusompa, la kupuji-Kiꞌ kupannoni gambus,
sabaꞌ tattaꞌ-Kiꞌ mangpakamojaꞌ.
Oo Puang Allataala to malaꞌbih, to nasompa to-Israel,
la kupakkelongan-Kiꞌ kelong pangpujian dipannonian cuꞌbekan.
23 Marionaꞌ,
kumukkun mpakkelongan-Kiꞌ kelong pangpujian.
Masannang penawangkuꞌ makkelong mpuji-Kiꞌ,
sabaꞌ mangkamoꞌ Tapasalamaꞌ.
24 Allo-allonaꞌ la mpangpeissenanni to kamarurusan-Taꞌ,
sabaꞌ ia to tomangngatta ncilakainaꞌ,
mangkami ditaloi sola dipakasiriꞌ.