Passambajang ke masussakiꞌ
69
Dipatuju lako tomangpalunna tomakkelong. Nturuꞌ kelong “Bunga Bakung”. Kelongna Raja Daud.2 Oo Puang Allataala, pasalamaꞌnaꞌ,
sabaꞌ angge kollongkuꞌmi to wai.
3 Naammaꞌnaꞌ buka mandalan,
na teꞌdamo kunii mentumpu.
Tallannaꞌ doꞌ wai liwaꞌ mandalan,
nabawamoꞌ ombaꞌ tasik.
4 Boꞌjoꞌmoꞌ metamba-tamba,
makasemi gora-gorakuꞌ.
Mapassemi matangkuꞌ
ntajan pangtulung-Na Puang Allataala to kusompa.
5 a Ia to tongkabaꞌcinaꞌ na teꞌda sabaꞌna,
laꞌbi budami na ia to beluakkuꞌ.
Gaja buda to tomadoang llanynyaꞌinaꞌ,
to nnewanaꞌ na teꞌda passabaranna.
Teꞌda to kuboko,
apa diparukunaꞌ mpapolei.
6 Oo Puang Allataala, Taissen ngasan to kasalankuꞌ,
na teꞌda kabunianan jio pengkitan-Taꞌ to sininna dosakuꞌ.
7 Oo Puang Allataala to makuasa,
danggiꞌ na akuꞌ napusabaꞌ
nakasirisan to tomangrannuan lako Kitaꞌ.
Oo Puang Allataala to nasompa to-Israel,
danggiꞌ na akuꞌ napusabaꞌ
nadicacca to tossompa-Kiꞌ.
8 Dicaccanaꞌ kudipakasiriꞌ,
sabaꞌ Kitaꞌ kukatappaꞌi.
9 Nasanga tolaenmoꞌ kakangkuꞌ sola adingkuꞌ,
nasanga toratumoraꞌ sileꞌtokuꞌ.
10 b Kamamalirankuꞌ lako Bola-Taꞌ
mpamalussu penawangkuꞌ,
na ia to nacaccan-Kiꞌ,
ia toomo nacaccannaꞌ.
11 Mpengkajionganmoꞌ kalekuꞌ kupuasa,
apa kannori dicacca joo kupugauk.
12 Mpakemoꞌ kaen karung tanda kamasussan,
apa kannori ia napellerannaꞌ tonnewanaꞌ.
13 Jio babangan to nanii tau sirempun,
jio toomi nanii ncurita gajaꞌnaꞌ,
nakabuatannaꞌ kelong to tomalango
napake mpelleꞌnaꞌ.
14 Oo Puang Allataala, moi napelleꞌnaꞌ,
apa tattaꞌnaꞌ massambajang metaꞌda tulung lako Kitaꞌ,
Tapebalinaꞌ situruꞌ wattu Tapueloh,
sabaꞌ liwaꞌ-Kiꞌ mpakamojaꞌnaꞌ.
Tulungnaꞌ, sabaꞌ teꞌda Tapaja mangpakamojaꞌ.
15 Tulungnaꞌ, danggiꞌ kususi to tallan doꞌ buka,
ruiꞌnaꞌ jiong mai wai mandalan.
Pasalamaꞌnaꞌ jio mai to tongkabaꞌcinaꞌ,
16 danggiꞌ elorannaꞌ susi to nabawa wai ombaꞌ matonggo,
baꞌtu susi to tallan doꞌ tasik liwaꞌ mandalan,
iarika susi to dilamun jiong garuang.
17 Oo Puang Allataala, tulungmoꞌ,
sabaꞌ melo penawa-Kiꞌ na tattaꞌ-Kiꞌ mpakamojaꞌnaꞌ.
Danggiꞌ pabokoꞌinaꞌ penawa,
sabaꞌ liwaꞌ-Kiꞌ mamase.
18 Danggiꞌ Tapabokoꞌi penawa tee kaunan-Taꞌ,
madoiꞌmi-Kiꞌ ntulungnaꞌ, sabaꞌ maparriꞌnaꞌ.
19 Ratumi-Kiꞌ llaꞌbaknaꞌ,
laꞌparannaꞌ jio mai ewakuꞌ.
20 Taissen umbo nakua ewakuꞌ mpakasiriꞌnaꞌ, ncaccanaꞌ na napau salanaꞌ.
Takita ngasan to nagaukannaꞌ.
21 Ia ngasanmo to pangcapaꞌna to mpaꞌdikki penawangkuꞌ
kukaꞌtu rannu.
Parannunaꞌ kumua den tau la ngkamaseinaꞌ,
apa teꞌda.
Parannunaꞌ kumua den tau la mpakatananaꞌ,
apa teꞌda kuampaꞌ.
22 c Apa kannoraꞌ naben kande palango.
Ia tongkumawakke kannoraꞌ naben anggoroꞌ macukka.
23 Akeꞌ na ia to kande sadia jio pangrameanna ncilakaii,
na pangramean pangsukkuruꞌna mpojai.
24 d Akeꞌ nabuta, danggiꞌ napakita,
Akeꞌ namapaꞌdik awakkana natangkullei keꞌdeh.
25 Sessami situruꞌ kamagallian-Taꞌ,
akeꞌ naperasaii to kamalussuan penawan-Taꞌ.
26 e Akeꞌ namakarorrong to bolana,
akeꞌ nateꞌda tau torro llan.
27 Nasabaꞌ ia to to-Tasessamo, napandasa poleꞌi ewakuꞌ
narangnganni poleꞌi paꞌdikkina to to-Tapaꞌdikki.
28 Akeꞌ nasabuda-budanna to dosana,
danggiꞌ Tasangai totangkasalan.
29 g Akeꞌ nadiputtai sanganna llan Suraꞌ Katuoanf,
danggiꞌ Tapatamai rekenan ummaꞌ-Taꞌ.
30 Apa ia tee akuꞌ, todipandasanaꞌ kumaparriꞌ.
Oo Puang Allataala, metaꞌdanaꞌ Talendungnginaꞌ
Tapasalamaꞌnaꞌ.
31 Jaji la mpujinaꞌ Puang Allataala kumakkelong,
mpakalaꞌbih-Hi mpukelong kelong sukkuruꞌ.
32 Laꞌbi Nakabudai Puang Allataala joo pangpujian
na ia to pangkaroba sapin muane sipatoꞌna dipassompan.
33 Na memmario to tomperasai parriꞌ ke nakitai kumua Napasalamaꞌmoꞌ Puang Allataala,
namasumangaꞌ poleꞌ to tomassompa lako Puang Allataala.
34 Nasabaꞌ Napesaꞌdingngii Puang Allataala to passambajangna to tokaasi-asi,
na teꞌda Nakalupaii to ummaꞌ-Na to ditarungku.
35 Ee lino, langiꞌ, tasik sola sininna issinna,
pakalaꞌbihhi to Puang Allataala,
36 sabaꞌ Ia la mpasalamaꞌ kota Yerusalem,
Napakeꞌdeh poleꞌi to sininna kota jio tana Yehuda,
nanii torro ummaꞌ-Na,
napumanahhi.
37 La napumanah tooi batiꞌna
nanii torro sininna to tongkamaliꞌ Puang Allataala.