Kelong kapataloan nnewa ewa
68
Dipatuju lako tomangpalunna tomakkelong. Kelongna Raja Daud.2 Keꞌdehmi Puang Allataala mpasisarak-sarak ewa-Na,
na sipalaian jio mai olo-Na to tongkabaꞌci-I.
3 Naulaꞌii Puang Allataala jio mai olo-Na, nataꞌpa lanynyaꞌ.
Susi rambu taꞌpa taꞌde ke nairiꞌi angin,
baꞌtu susi lilin lolong ke nakandei api,
susi toomi to togajaꞌ la lanynyaꞌ jio mai olo-Na Puang Allataala.
4 Apa ia to tomakassing la mario,
naliwaꞌ masannang jio olo-Na Puang Allataala.
5 Pakkelongan-Ni to Puang Allataala, pakalaꞌbihhi sangan-Na,
pasadian-Ni lalan to mpukareta saleuꞌ.
Iamo to disanga Puang Allataala.
Mario masannang kamuꞌ jio olo-Na.
6 Puang Allataala to cumadokko jao ngenan malaꞌbih-Na,
Iamo Napuambeꞌ sininna pea biung,
Nampangkadan too sininna baine to matemo muanena.
7 Puang Allataala mben ngenan nanii mariꞌpih to toteꞌdamo mparakaii.
Nalaꞌparan tooi to toditarungku, namasannang.
Apa ia to tonnewa Puang Allataala,
la daꞌtan ntorroi padang makase.
8 Oo Puang Allataala, to nasompa to-Israel,
ia ton-Tajoloan ummaꞌ-Taꞌ
messun jio mai tana Mesir,
llingkai padang makase,
9 a tiroge to lino na membanasa to uran jao mai langiꞌ.
Kitaꞌmo to mangkada jao mai Buntu Sinai lako ummaꞌ-Taꞌ.
10 Oo Puang Allataala, Kitaꞌ mpamarambakki to uran,
napumeloi padang-Taꞌ to makase,
11 nanii mariꞌpih ummaꞌ-Taꞌ.
Oo Puang Allataala, kameloan penawan-Taꞌ
Tajampangngi to tokaasi-asi.
12 Puang Allataala mangkada,
na buda baine mparatu kareba
13-14 nakua, “Ia to raja malemi palai sola tentarana,
sipalaian tonganmi.”
Ia to baine torro jio bola,
ntawa-tawai bulawan sola peraꞌ, to nasalai puangna.
Moi naden to teꞌda namale parari,
apa mputawa tooi barang diala,
susinna patung jangan-jangan disapuꞌ peraꞌ to paniꞌna,
nacundallak bulunna disapuꞌ bulawan massang.
15 Ia tonna pasisarak-sarakki Puang Allataala Tomakuasa to raja,
ia joo wattu uran saljui jao Buntu Zalmon.
16 Ia to Buntu Basan liwaꞌ tonggo,
na gaja buda potokkona.
17 Ee buntu Basan, ciapari namangngimburu tuu matiꞌ potokkomu ngkita Buntu Sion
to Napilei Puang Allataala Nanii torro?
Nang la Nanii tarruh torro Puang Allataala teꞌda anggena.
18 Mangpulo-pulo saꞌbu kareta-Na Puang Allataala.
Mellaomi Puang Allataala jao mai Buntu Sinai
na mentama ngenan malaꞌbih-Naꞌ.
19 b Endek-Ki Puang Allataala deꞌ ngenan majao
ssolan buda to-Najokko.
Ntarimai passompa jio mai tolino,
moi passompana ewana,
dikua nawaꞌding torro sola Puang Allataala.
20 Dipakalaꞌbih to Puang Allataala,
sabaꞌ Iamo mangka mpasalamaꞌkiꞌ.
Allo-allokiꞌ Naparakai.
21 Puang Allataala to tasompa, Iamo mpasalamaꞌkiꞌ,
Puang Allataala to tasompa llaꞌparankiꞌ jio mai kuasa kamatean.
22 Nang la naicak-icak Puang Allataala to ulunna ewa-Na,
Natesse-tessei to kararo ulunna to totarruh-tarruh mpugauk dosa.
23 Nakua Puang Allataala, “Ee ummaꞌ-Kuꞌ, Kupapolei jio mai tana Basan to ewami,
Kupapole poleꞌi jiong mai tasik mandalan,
24 dikua misilese-leseii to rarana,
nalepaꞌi tooi asummi samosona.”
25 Oo Puang Allataala, Raja to kusompa,
nakita ngasan tau to pangbarisiꞌ sabaꞌ patalo-Kiꞌ,
tomangbarisiꞌ mangnguju lako Bola malaꞌbih-Taꞌ.
26 Joloi lako lumingka to sininna pakkelong,
naundi jio bokoꞌna to sininna pangcuꞌbekan,
na llan tangngana to anaꞌdara ndedek rebana.
Susi tee to kelongna:
27 “Puji-I Puang Allataala llan kasirempunan ummaꞌ-Na,
ee sininna batiꞌna Yakub, puji-I Puang Allataala.”
28 Najoloanni suku Benyamin, batiꞌ anak tampakkana Yakub,
naundi jio bokoꞌ mangbaloleꞌ to ambeꞌ kampongna suku Yehuda,
suku Zebulon na suku Naftali.
29 Madoang-Ngi Puang Allataala mimawatang.
Oo Puang Allataala, pangpekitan poleꞌi to kamawatangan-Taꞌ
susi to mangka Tapugauk lako kamiꞌ.
30 Ia to sininna raja mbawa passompa lako Kitaꞌ
na dipatama Bola-Taꞌ jio kota Yerusalem.
31 Tagarraꞌi to to-Mesir,
to susi olok-olok masiaꞌ llan tangnga tanglah,
tundunni to bangsa
to susi sapin muane mangbaloleꞌ
to sipandasa ssialai peraꞌ.
Tapasisarak-sarakki to sininna bangsa
to nakabudai sirari.
32 Naratu to ambeꞌ kampong jio mai tana Mesir mbawa tambaga sabaꞌ ditalomi,
naparri-parrii to-Etiopia ratu mbawa passompa lako Puang Allataala.
33 Ee sininna karajaan llan lino, pukelong kamuꞌ kelong pangpujian,
mpakalaꞌbih Puang Allataala.
34 Pakalaꞌbih-Hi Puang Allataala to mangkareta
nnola jao langiꞌ to nang denmo tempon jiona mai.
Pesaꞌdingngii! Mangkada-I Puang Allataala,
na menggalugu to gamaran-Na.
35 Akuii to kuasan-Na Puang Allataala to mparenta to-Israel,
to kakuasan-Na ratu deꞌ langiꞌ.
36 Liwaꞌ mejangngaran to Puang Allataala jao ngenan malaꞌbih-Na.
Puang Allataala to nasompa Israel, mben kuasa sola kamawatangan lako ummaꞌ-Na.
Pakalaꞌbih-Hi Puang Allataala.