Kelong pangpujian sola mangsukkuruꞌ
66
Dipatuju lako tomangpalunna tomakkelong. Kelong.Ee sininna tolino, mario kamuꞌ mpakalaꞌbih Puang Allataala.
2 Makkelong kamuꞌ mpakalaꞌbih sangan-Na,
mpukelong kelong pangpujian.
3 Paui lako Puang Allataala llan kelongmi kumua,
“Liwaꞌ mejangngaran to Tapugauk.
Kamakuasan-Taꞌ, naliwaꞌ malajaꞌ to ewa
na mengkatalo lako Kitaꞌ.
4 Sininna tau llan lino sujuꞌ ssompa-Kiꞌ,
namakkelong mpukelong pangpujian
mpakalaꞌbih sangan-Taꞌ.”
5 Male kamuꞌ mai ngkitai to Napugauk Puang Allataala,
ia to panggaukan-Na lako tolino, liwaꞌ mejangngaran.
6 a Ia to tasik Napupenjaji padang makase,
Napupemmakase tooi to saꞌdan nalambannii tojolotaꞌ.
Iamo joo tapumarioi to sininna Napugauk.
7 Makuasa na mawatang to Puang Allataala
mangparenta na teꞌda anggena,
Namataii to sininna bangsa
danggiꞌ namatampo to tonnewa-I.
8 Ee sininna bangsa, pakalaꞌbihhi Allataala to kisompa,
pangpesaꞌdinganni gamarammi mpuji-I.
9 Nalendungngikan kitattaꞌ tuo,
na Najagaikan jio mai abalaꞌ.
10 Oo Puang Allataala, mangkamokan Tauji,
mangkamokan Tapaccingngi,
susi peraꞌ disaꞌpo llan api namemmassang.
11 Iamo Tapupangngelohnakan naala pojana ewa,
Tapakannaikan kamaparrisan liwaꞌ mabandaꞌ.
12 Tapupangelohnakan nalese-lese ewa.
Maparriꞌkan susi tonakanna abalaꞌ wai buda baꞌtu api mangkande.
Apa ia too Tasolanmokan
lako ngenan to kinii manyaman tuo.
13 b La malenaꞌ lako bola-Taꞌ mpassompan karoba pantunu.
La mpalaꞌpahnaꞌ tinjaꞌkuꞌ lako Kitaꞌ,
14 tinjaꞌ to kupau
tongkuperasai kamaparrisan.
15 Mpassompannaꞌ karoba pantunu lako Kitaꞌ,
to patuoan makassing kupilei,
iamo to domba muane, sapin muane sola beke muane,
natindak rambunna deꞌ langiꞌ.
16 Ee sininna tongkalajaꞌ-ngkasiriꞌ Puang Allataala, pesaꞌdingngii!
La kucuritan kamuꞌ to Napugauk Puang Allataala lako akuꞌ.
17 Mangkamoꞌ metaꞌda tulung lako kale-Na,
kupakalaꞌbih-Hi mpukelong kelong pangpujian.
18 Ia kenna la den akkatta gajaꞌ llan penawangkuꞌ,
nang la teꞌda Namadoang ntulungnaꞌ.
19 Apa Napesaꞌdingngimoꞌ Puang Allataala,
Naparinawai to petaꞌdangkuꞌ.
20 Mpakalaꞌbihnaꞌ Puang Allataala, to mpebali sambajangkuꞌ,
na teꞌda Napaja mpakamojaꞌnaꞌ.