Kelong mangkurru sumangaꞌ
65
Dipatuju lako tomangpalunna tomakkelong. Mesaꞌ kelongna Raja Daud.2 Oo Puang Allataala, sipatoꞌ-Kiꞌ dipakalaꞌbih jao Buntu Sion,
na jao nanii tau mpugauk tinjaꞌna lako Kitaꞌ.
3 Kitaꞌ Puang Allataala to mpebali passambajang.
Sininna tau ratu ngasan lako Kitaꞌ,
4 sabaꞌ madosai.
Moi naliwaꞌmo buda dosakiꞌ
susi pamawa tangkikulle mpassanni,
apa Taaddampangankan.
5 Maupaꞌ to to-Tapilei
Tatambaii, naratu massompa jio tarampak Bola-Taꞌ.
Dennaa upaꞌ nasau penawangkiꞌ mperasai kameloan
llan Bola malaꞌbih-Taꞌ.
6 Oo Puang Allataala to mpasalamaꞌkan,
maruruh-Kiꞌ na mpugauk-Kiꞌ mangrupa-rupa tanda mejangngaran,
iamo Tapake mpebali petaꞌdankiꞌ.
Na Kitaꞌmo nanii mangrannuan sininna bangsa,
moi bangsa jio pulau to liwaꞌ mabela.
7 Kamawatangan-Taꞌ Tapakeꞌdehhi to buntu,
nanii pajan kamakuasan-Taꞌ.
8 Kamakuasan-Taꞌ mparadanni to ombaꞌ tonggo nnongngoh jiong tasik.
Kitaꞌ mpapajai to kamarongkanna sininna bangsa.
9 Sininna tolino jangngah ngkitai to Tapugauk.
Iamo joo nataratteꞌ-Kiꞌ.
Mangpamula jio mai kadellekan ratu tama kalambunan,
sininna tau Tapupemmario mpakalaꞌbih-Kiꞌ.
10 Tabarakkaꞌi to sininna padang,
Taparatuanni uran,
napumalompoi, nabuda asseleꞌna.
Tapaden tarruhhi to wai jiong saꞌdan-Taꞌ
nateꞌda napaja lolong,
namembua to gandumna tau.
Susimi joo to tolino Tapasadian padang.
11 Taparatu uran llolongngi lalan tengkona,
nabosok to sininna kalimbaunna,
namaloppo litakkana.
Tabarakkaꞌii to tananan
namentaruk namelo tuona.
12 Na kameloan penawan-Taꞌ, narundun taun endek to asseleꞌ padang,
na umbo-umbo Tanii, jio toomi nanii padang memmaloppo.
13 Na moi padang pallawangan natuoimo reu maloppo,
na sininna to apa tuo jao buntu susi to tomario masannang.
14 Nagaja buda beke sola domba
susi kaen ssamboi padang,
na sininna lombok susi to messalemuꞌ gandum,
susi to tomario masannang makkelong.