Ngkamaliꞌ Puang Allataala
63
a Kelongna Daud tonna jio padang pallawangan Yehuda.2 Oo Puang Allataala, Kitaꞌmo to kusompa,
makaleꞌ unapa kuangah-Kiꞌ sabaꞌ kukamaliꞌ-Kiꞌ,
susi padang makase tangnatuoi tananan to mparallui uran,
susi toomi joo penawangkuꞌ mamaliꞌ lako Kitaꞌ.
3 Kukitami-Kiꞌ llan Bola-Taꞌ,
kumukkun too ngkita kamawatangan sola kamalaꞌbiran-Taꞌ.
4 Nasabaꞌ ia to pangpakamojaꞌ-Taꞌ
laꞌbi makeanggaꞌ na ia to katuoan,
iamo joo kupakalaꞌbih-Kiꞌ.
5 Iamo joo la kupuji-Kiꞌ angge tuokuꞌ
kuangkaꞌ limangkuꞌ massambajang.
6 Gaja rionaꞌ mpakalaꞌbih-Kiꞌ,
sabaꞌ Tapemasannangnginaꞌ,
susi to napebarahhi kande malundaꞌ.
7 Moi jaonaꞌ katindoankuꞌ tattaꞌ-Kiꞌ kuingaran,
kunawa-nawa-Kiꞌ siupuh bongi,
8 sabaꞌ Kitaꞌmo mangka ntulungnaꞌ.
Mentilendungnaꞌ lako Kitaꞌ susi anak manuk jiong paniꞌna indona,
kumukkun mario makkelong mpakalaꞌbih-Kiꞌ.
9 Mengkamandiknaꞌ lako Kitaꞌ,
na lima kuasan-Taꞌ ntumpaknaꞌ kumawatang keꞌdeh.
10 Apa ia to tomadoang la mpateinaꞌ,
iamo la mendoꞌ lino tomate.
11 La mate dipaꞌdangngii,
nakandei asu lampung.
12 Apa ia to raja la mario,
sabaꞌ Natulungngi Puang Allataala.
Ia to massapah mpau sangan-Na Puang Allataala,
la masannang-sannang,
apa ia to pangnguraga,
la dimummun angaꞌna.