Matanakiꞌ mentilendung lako Puang Allataala
62
Dipatuju lako tomangpalunna tomakkelong nturuꞌ Yedutun. Kelongna Raja Daud.2 Ia manda kumatana ke tattaꞌnaꞌ mentilendung lako Puang Allataala,
sabaꞌ Ia mpasalamaꞌnaꞌ.
3 Ia mandara butung buntu batu pentilendungankuꞌ, mpasalamaꞌnaꞌ.
Ia too kupumawatang butung kota den bentengna, na teꞌda ntalonaꞌ.
4 Pirara masainna la minii sola ngasan la nnewanaꞌ tee akuꞌ to mesa-mesa?
Ciapari milannicak-icaknaꞌ, na susimoraꞌ rinding la songka
baꞌtu susi temboꞌ la roꞌpokmo?
5 Madoangra kamuꞌ la nnalainaꞌ
jao mai kaparentankuꞌ.
Mikabudai mangnguraga
mpake kamuꞌ timummi mangbarakkaꞌi,
apa mangtangdoi kamuꞌ llan penawammi.
6 Ia manda kumatana ke tattaꞌnaꞌ mentilendung lako Puang Allataala,
sabaꞌ Iamo kurannuan.
7 Ia mandara butung buntu batu pentilendungankuꞌ, mpasalamaꞌnaꞌ,
Ia too kupumawatang butung kota den bentengna, na teꞌda ntalonaꞌ.
8 Puang Allataala mbennaꞌ kasalamatan sola kadianggasan.
Iamo pentilendungankuꞌ to mawatang susi buntu batu matonggo.
9 Ee bangsakuꞌ, tattaꞌ kamuꞌ matappaꞌ lako Puang Allataala,
pauan ngasanni to issi penawammi,
sabaꞌ Ia pentilendungantaꞌ.
10 Ia to tolino, la tobiasa la tomapangkaꞌ, teꞌda ngasan buaꞌna dipattuan to pangtulungna,
susiri angin pempissenra dipessuean na taꞌdemo.
Ia ke ditimbangngi,
laꞌbi maringngan na angin.
11 Danggiꞌ rannuanni to asseleꞌ diala bang,
danggiꞌ pattuanni joo barang diala.
Ia ke sabuda-budannami to kasugiranmi,
danggiꞌ na ia naleꞌkeꞌi penawammi.
12 Penduan pentallunmoꞌ ssaꞌding
Puang Allataala mangkada,
Nakua, “Pole jio mai Akuꞌ to kakuasan
13 a Kutattaꞌ mangpakamojaꞌ.”
Oo Puang Allataala, Kitaꞌmo mpabalahhii to simesaꞌ-mesaꞌ tau,
situruꞌ panggaukanna.