Mpassambajangan raja
61
Dipatuju lako tomangpalunna tomakkelong, dipannonian cuꞌbekan. Kelongna Raja Daud.2 Oo Puang Allataala, pesaꞌdingngii sarrokuꞌ,
parinawai to petaꞌdangkuꞌ.
3 Jio mai cappaꞌ lino, kunii sumarro lako Kitaꞌ,
sabaꞌ kaꞌtu rannunaꞌ.
Solannaꞌ deꞌ buntu batu majao to tangkukulle ntukaꞌii,
kumanyaman.
4 Tongan Kitaꞌmo pentilendungankuꞌ
susi temboꞌ mawatang teꞌda nakullei ewa ssuangngi.
5 Elorannaꞌ torro tarruh llan ngenan malaꞌbih-Taꞌ,
kumanyaman mentilendung lako Kitaꞌ,
susi anak manuk jiong paniꞌna indona.
6 Oo Puang Allataala, mangkamo Tasaꞌding to tinjaꞌkuꞌ,
na Tabenmoꞌ sininna to Tapasadian tongkalajaꞌ-ngkasiriꞌ-Kiꞌ.
7 Dennaa upaꞌ namalambeh sungaꞌ to raja,
nawaꞌdingpa ngkita batiꞌna.
8 Dennaa upaꞌ namangparenta teꞌda anggena jio olo-Taꞌ.
Dennaa upaꞌ Talendungngii pangpakamojaꞌ-Taꞌ sola katonganan-Taꞌ.
9 La tattaꞌnaꞌ mpakkelongan-Kiꞌ kelong pangpujian,
kupugaukki allo-allo to tinjaꞌkuꞌ.