Passambajang mpetaꞌda pangtulung
60
Dipatuju lako tomangpalunna tomakkelong. Nturuꞌ kelong “Bunga bakung tanda saꞌbi”. Kelong pangngajahna Raja Daud, 2 atonna rrari to-Aram-Mesopotamia, na to-Aram-Zoba, sola tonna pole Yoab ntaloi sangpulo dua saꞌbu to-Edom jio Lombok Maceꞌla.3 Oo Puang Allataala, ciapari Tasalaikan,
Takabirihkan,
Taelorankan ditalo?
Pemeloi poleꞌmi katuoankiꞌ too.
4 Mangkami Tapatiroge to lino napiak to padang,
pemeloi poleꞌi to baꞌtakna, sabaꞌ la tuanmi.
5 Tapupangngelohnakan kamiꞌ ummaꞌ-Taꞌ mperasai kamaparrisan laꞌdaꞌ,
kitibaꞌjun-baꞌjun, susi to nnisoꞌ anggoroꞌ melangoan.
6 Na ia to tomatappaꞌ lako Kitaꞌ, mangkamo Tapangngingaran namajaga,
nadanggiꞌ nabasai panana ewana.
7 b Pasalamaꞌmokan mpake kuasan-Taꞌ,
pebalii to passambajangkiꞌ,
kisalamaꞌ tee kamiꞌ to Tapakamojaꞌ.
8 Mangkada-I Puang Allataala jao mai ngenan malaꞌbih-Na Nakua,
“Patalo-Moꞌ, na mario-Naꞌ la ntawa-tawa tana Sikhem,
Kusukaꞌi to Lombok Sukot, la Kutawa-tawa.
9 Tana-Kuꞌ to tana Gilead sola tana suku Manasye,
butung Kupusongkoꞌ bassi to tana suku Efraim,
na tekken karajaan-Kuꞌ to tana suku Yehuda.
10 Apa ia to tana Moab, iamo ngenan pembasean aje-Kuꞌ.
Kupellekkoranni to sapatung-Kuꞌ, nataꞌpa jio tana Edom,
menjaji tanda kumua tana-Kuꞌ too.
Kupumario to kataloanna to-Filistin.”
11 Indara la ssolannaꞌ lako tana Edom?
Indara la njoloannaꞌ lako joo kota naguririkki temboꞌ matande namawatang?
12 Oo Puang Allataala, butung to Tacaꞌbeanmokan,
na teꞌda Tamale parari sola tentarakiꞌ.
13 Tatulungmokan kisalamaꞌ jio mai ewakiꞌ,
sabaꞌ teꞌda buaꞌna to pangtulung tolino.
14 Ia ke Nasolankiꞌ Puang Allataala, mawatangkiꞌ tabarani,
sabaꞌ Ia-ia la ntaloi to ewataꞌ.