Passambajang dilaꞌparan jio mai ewa
59
1 a Dipatuju lako tomangpalunna tomakkelong. Nturuꞌ kelong, “Danggiꞌ manglanynyaꞌi”. Kelongna Daud tonna suai Raja Saul to taunna mmata-matai bolana Daud, mangngatta la mpateii.2 Oo Puang Allataala to kusompa,
pasalamaꞌnaꞌ jio mai sininna ewakuꞌ,
lendungnginaꞌ jio mai to torrarinaꞌ.
3 Laꞌparannaꞌ jio mai to tompugauk kagajatan,
pasalamaꞌnaꞌ jio mai to topapatean.
4 Oo Puang Allataala, kitari naadangnaꞌ joo tomadoang la mpateinaꞌ.
Mesaꞌ penawai joo tomaparrang nnewanaꞌ,
moi na teꞌda salakuꞌ,
iarika dosakuꞌ.
5 Mangparri-parrii sadia la nnewanaꞌ,
moi nateꞌda kukasalan.
Male-Kiꞌ mai Tatulungnaꞌ.
6 Oo Puang Allataala to makuasa,
Puang Allataala to nasompa to-Israel,
Tasessami to bangsa,
danggiꞌmo Takamaseii to tompugauk kagajatan mbaluk sobaꞌna lako ewa.
7 Lambunpi allo namaneꞌ pole tama kota
namale llilingngii
namarongka susi asu sibongka.
8 Napangpesaꞌding-saꞌdingan bang to pangpelleꞌna,
gaja taran to lilana susi piso,
nasanga teꞌda tau ssaꞌdingngi.
9 Apa Kitaꞌ Puang Allataala mpetawa-tawaii,
Tacapaꞌi to bangsa.
10 Oo Puang Allataala, Kitaꞌmo kamawatangankuꞌ, mangrannuan lakonaꞌ Kitaꞌ,
Kitaꞌra butung buntu batu kunii mentilendung.
11 Puang Allataala to kusompa la ratu ntulungnaꞌ,
sabaꞌ Napakamojaꞌ tarruhnaꞌ,
Naelorannaꞌ ngkita ewakuꞌ ditalo.
12 Danggiꞌmo Tapateii to ewakuꞌ,
nadanggiꞌ nakalupaii bangsakuꞌ to Tagaukanni.
Oo Puang Allataala, Kitaꞌmo susi perisai llendungngikan,
Taulaꞌ male melakoi, Tataloii mpake kuasan-Taꞌ.
13 Timunna mpusabaꞌi namadosa,
akeꞌmo napojai panggaukan matampona,
sabaꞌ nakabudai mangtangdoi sola mangnguraga.
14 Cappuꞌii nalanynyaꞌ,
Tanii mpangpekitanni kumua mabirih-Kiꞌ,
naissenni tau kumua,
Kitaꞌ Puang Allataala mparenta to-Israel,
sola sininna bangsa llan lino.
15 Lambunpi allo namaneꞌ pole tama kota
namale llilingngii
namarongka susi asu sibongka,
16 susii asu male melako nnangah kande,
namangburoroh ke teꞌdai kande naampaꞌ.
17 Apa ia tee akuꞌ, makkelongnaꞌ mpukelong kamawatangan-Taꞌ,
gumalasinaꞌ ke makaleꞌi mpukelong pangpakamojaꞌ-Taꞌ,
sabaꞌ Kitaꞌmo butung buntu batu
kunii mentilendung ke nnoloinaꞌ abalaꞌ.
18 Oo Puang Allataala to mpamawatangnaꞌ,
kupatuju lako Kitaꞌ to kelong pangpujian,
sabaꞌ Kitaꞌra butung buntu batu kunii mentilendung.
Oo Puang Allataala to kusompa, Kitaꞌ to tattaꞌ mpakamojaꞌnaꞌ.