Passambajang metaꞌda nadipabalahhi to ewa
58
Dipatuju lako tomangpalunna tomakkelong. Nturuꞌ kelong “Danggiꞌ manglanynyaꞌi”. Kelongna Raja Daud.2 Ee sininna tomakuasa, maruruh unaraka to pangraꞌtahmi?
Teqda unaraka mimangpasilaenan ke rra'tah kamuꞌ kara-karana tolino?
3 Teꞌda! Kannora kamuꞌ mangngatta mpugauk kagajatan,
na maparrang to mipugauk llan lino.
4 Maneꞌ diparibaꞌtangngi to togajaꞌ nang nakaꞌpanmo to kagajatan,
maneꞌ dijajianni na llanmo penawanna to kabuttok-buttok.
5 Susii ulah keipo,
na mangmataru-taru susi ulah balu.
6 Susii ulah to ciaꞌ nturuꞌ kadanna tomacca mangparammaꞌ
iarika gamaranna tomacca mangbaca-baca.
7 Oo Puang Allataala, leꞌtoan ngasanni isinna joo tomangpanggaukan gajaꞌ
susi lleꞌtoan tora singa.
8 Akeꞌmo nataꞌde susi wai naammaꞌ litak,
na malaju susi reu jio lalan.
9 Akeꞌ nasusi koteng mate mangbolok-bolok,
susi pea mate llan baꞌtangna indona to teꞌdapa nasikita masiang.
10 Teꞌda nakalannaii namasolangmo,
susii cenaꞌ duri to macikkiꞌ unapa,
apa cappuꞌ unai napentiaran angin.
11 Ia to tomakassing mario ngkitai to togajaꞌ dipabalahhi,
na ia to rarana totangnturuꞌ parenta-Na Puang Allataala nalese-lese tomaruruh.
12 Nakua to tau mangkada, “Nang nnampaꞌ ia bua melona to tomakassing.
Na tongan kumua den Puang Allataala rraꞌtah kara-karana tolino.”