Ia ke llankiꞌ kamasussan rrannuankiꞌ Puang Allataala
56
a Dipatuju lako tomangpalunna tomakkelong. Nturuꞌ kelong “Jangan-jangan jao kaju tarbantin jio kampong mabela”. Kelongna Raja Daud, tonna jokkoi to-Filistin jio kota Gat.2 Oo Puang Allataala, kamaseinaꞌ, sabaꞌ nalaoinaꞌ ewakuꞌ,
napandasa tarruhnaꞌ.
3 Allo-allonaꞌ nasessa ewakuꞌ,
naliwaꞌ buda tomaparrang matampo nnewanaꞌ.
4 Ia tongkumalajaꞌ,
Kitaꞌ kunii mangrannuan.
5 Mpakalaꞌbihnaꞌ Puang Allataala,
sabaꞌ mangka-I mangjanji la mpasalamaꞌnaꞌ.
Teꞌda kumalajaꞌ, sabaꞌ matappaꞌnaꞌ lako Puang Allataala.
Teꞌdamo la nagaukannaꞌ tolino.
6 Siupuh allo to ewakuꞌ mbalikannaꞌ kada,
natattaꞌ bang mangngatta ncilakainaꞌ.
7 Sirempunni jio ngenan kabunian,
napematai bang to apa kupugauk,
namadoang la mpateinaꞌ.
8 Liwaꞌ gajaꞌ to panggaukanna,
waꞌding unarika la salamaꞌ?
Oo Puang Allataala, Tasolangngii tuu lako tau
Tanii mpakitanni kumua mabirih-Kiꞌ.
9 Kitaꞌ nnissenni to kamaparrisankuꞌ,
Kitaꞌ ngkitai to wai matangkuꞌ,
na mangka ngasanmo Taukiꞌ llan suraꞌ-Taꞌ.
10 Matappaꞌnaꞌ kumua Tapangkadannaꞌ.
Iamo joo napole bokoꞌ to ewakuꞌ
ke metaꞌda tulungnaꞌ.
11 Mpakalaꞌbihnaꞌ Puang Allataala,
sabaꞌ Najanjinaꞌ Napasalamaꞌ.
12 Teꞌda kumalajaꞌ, sabaꞌ matappaꞌnaꞌ lako Puang Allataala.
Teꞌdamo gaena tolino la mpegaukkinaꞌ.
13 Oo Puang Allataala, la kupugaukmi to mangka kupangtinjaran lako Kitaꞌ,
kupassompan karoba mangsukkuruꞌ.
14 Nasabaꞌ Tatulungnaꞌ na teꞌda kumate,
Kitaꞌ njagainaꞌ na teꞌda kumelolin.
Iamo joo kuwaꞌding tuo jio olo-Na Puang Allataala
llan arrang to mepatuo.