Passambajang metaꞌda dilendungngi jio mai ewa
55
Dipatuju lako tomangpalunna tomakkelong, dipannonian cuꞌbekan. Kelong pangpangngajahna Raja Daud.2 Oo Puang Allataala, pesaꞌdingngii passambajangkuꞌ,
Danggiꞌ Tapabokoꞌi penawa to petaꞌdangkuꞌ.
3 Pesaꞌdingnginaꞌ, Tapebalinaꞌ.
Tuli kumarraknaꞌ, sabaꞌ masussanaꞌ.
Tangrapaꞌ penawangkuꞌ,
4 sabaꞌ ssaꞌding tarruhnaꞌ ewakuꞌ mpetamba-tambannaꞌ,
napangngandonaꞌ to togajaꞌ.
La nasessa toonaꞌ,
namagajinawa nnewanaꞌ.
5 Liwaꞌnaꞌ malajaꞌ, kumbeꞌbeh,
sabaꞌ susi to la matemoꞌ.
6 Natalimbungnaꞌ kamalajatan kumbeꞌbeh,
butung nasamboinaꞌ to mekarrangan bulu.
7 Kukuamo llan penawangkuꞌ,
“Ia ke la kepaniꞌnaꞌ susi jangan-jangan,
la mentiaꞌnaꞌ male nnangahhi to ngenan la kunii manyaman.
8 Kumale gaja bela,
kutorro jio padang pallawangan.
9 La kuparri-parrii nnangah ngenan pentilendungan,
danggiꞌ nasuangnaꞌ angin baraꞌ iarika kalimpuru.”
10 Oo Puang Allataala, Tapapussakki ewakuꞌ,
pasisala pahangngi kadanna
sabaꞌ ngkitanaꞌ kamaparrangan sola kasisakkan llan kota.
11 Allo-bongii male bang llingkai temboꞌ kota,
mpugauk kagajatan na mpaden kamarongkan.
12 Umbo-umbo nanii tuli makkasolang
na mukkun bang mpandasa tau
sola majekkong jio pasaꞌ.
13 Ia ke nacaccanaꞌ ewakuꞌ,
waꞌding unapaꞌ ssabbarasanni,
iarika nakita sereꞌnaꞌ,
waꞌding unapaꞌ mpessalaii.
14 Apa sibalikanna iko to gaja kusisobaran,
naliwaꞌ kukatappaꞌi,
15 to gaja kusiamaran,
to tempon jiopa mai kusolan male
massompa tama Bola Puang Allataala,
kannora iko ncaccanaꞌ.
16 Akeꞌ nataꞌpa mate to ewakuꞌ,
akeꞌ namendoꞌ tuo lino tomate,
sabaꞌ kagajatan mandamo llan penawanna
na kagajatan manda to napugauk llan kampong.
17 Apa metaꞌda tulungnaꞌ lako Puang Allataala,
Napasalamaꞌnaꞌ.
18 Allo-bonginaꞌ sumarro sola kumarrak,
Napesaꞌdingngii to sarrokuꞌ.
19 Ia mpasalamaꞌnaꞌ jio mai ewakuꞌ to rrarinaꞌ,
to sibombonan ratu nnewanaꞌ.
20 Puang Allataala to mangparenta mellao jiona mai,
la mpesaꞌdingnginaꞌ Nataloii to togajaꞌ,
sabaꞌ ciaꞌi mengkatobaꞌ,
na teꞌda nangkalajaꞌ-ngkasiriꞌ Puang Allataala.
21 Ia joo sobaꞌkuꞌ ncilakai solana,
natangningaranmi janjinna.
22 Melo to messun jio timunna,
apa makani-kani llan penawanna.
Malamma to kadanna,
apa mepaꞌdikan penawa
susi paꞌdang gaja taran pagajang.
23 Mangrannuan lakoko Puang Allataala ke masussako
na Ia ntulungko,
sabaꞌ teꞌda Napupangngelohnai Puang Allataala ditalo to tomakassing.
24 Oo Puang Allataala, Kitaꞌ kitaꞌna la ncaꞌbeanni
doꞌ garuang gaja mandalan to topangnguraga sola topapatean.
Ia to pangnguraga malolleꞌ unapa namatemo.
Apa ia tee akuꞌ, matappaꞌnaꞌ lako Kitaꞌ.