Passambajang metaꞌda pentilendungan
54
Dipatuju lako tomangpalunna tomakkelong, dipannonian cuꞌbekan. Kelong pangpangngajahna Daud, 2 a tonna male to to-Zifi mangpeasa lako Raja Saul, nakua, “Jioi kampongkiꞌ Daud membuni.”3 Oo Puang Allataala, pasalamaꞌnaꞌ, sabaꞌ makuasa-Kiꞌ,
pangkadanni to kara-karakuꞌ, sabaꞌ kamawatangan-Taꞌ.
4 Oo Puang Allataala, metaꞌdanaꞌ Tapesaꞌdingngii passambajangkuꞌ,
parinawai tee petaꞌda tulungkuꞌ,
5 sabaꞌ nararimoꞌ tomatampo,
namadoang to tomaparrang mpateinaꞌ,
teꞌda lalo ia namalajaꞌ lako Puang Allataala.
6 Apa Puang Allataala to ntulungnaꞌ,
Puang Allataalamo mpemawatangnginaꞌ.
7 Akeꞌ napoleii panggaukan gajaꞌna tonnewanaꞌ,
lanynyaꞌii, sabaꞌ tattaꞌ-Kiꞌ mpugauk janjin-Taꞌ.
8 Oo Puang Allataala, kucanningan ati mpassompan karoba lako Kitaꞌ,
mangsukkuruꞌnaꞌ, sabaꞌ kameloan penawan-Taꞌ.
9 Mangkami-Kiꞌ llaꞌparannaꞌ jio mai sininna kamasussankuꞌ
kukitai to ewakuꞌ ditalo.