Pangsessa lako togajaꞌ
52
Dipatuju lako tomangpalunna tomakkelong. Kelong pangpangngajahna Daud, 2 a tonna male Doeg to-Edom mangpeasa lako Raja Saul kumua ratumi Daud jio bolana Ahimelekh.3-4 Ee pangbarani, ciapari mumatampo?
Ciapari mupugauk kagajatan lako to-Napakamojaꞌ Puang Allataala?
Ee pangnguraga, siupuh alloko mangngatta bang ssolangngi tau,
ia to lilamu mataran mpaꞌdikki penawanna tau susi piso pakerreꞌ.
5 Laꞌbi mukacinnai to kagajatan na ia to kameloan,
laꞌbi mukabudai to mangnguraga na ia to mpau katonganan.
6 Ee pangnguraga, mukabudai to kabuttok-buttok,
na mpasisala-sala tau.
7 Apa la Nasessa tarruhko Puang Allataala,
mudijokko mudigararak llan mai bolamu,
mudicaꞌbean tama lino tomate.
8 Iamo napumalajaꞌ to tomakassing tonna kitai joo apa jaji,
napetawa-tawaii nakua,
9 “Susimi joo to tociaꞌ mentilendung lako Puang Allataala,
apa mangrannuan lakori kasugiranna to liwaꞌ buda,
na mpattuan kamawatanganna ssolangan tau.”
10 Apa ia tee akuꞌ, susinaꞌ garontoꞌ zaitun macikkiꞌ
matana llan Bola Puang Allataala.
Tattaꞌnaꞌ matappaꞌ kumua
tattaꞌ-I Puang Allataala mangpakamojaꞌ teꞌda anggena.
11 Oo Puang Allataala, tattaꞌnaꞌ mangsukkuruꞌ lako Kitaꞌ sabaꞌ sininna to Tapugauk,
iamo joo kupangpeissenanni to kameloan penawan-Taꞌ jio olona ummaꞌ-Taꞌ.