Sambajang nnakui dosa
51
Dipatuju lako tomangpalunna tomakkelong. Kelongna Raja Daud, 2 atonna mangka Nabi Natan ncaccai, sabaꞌ manggauk salai sola Batsyeba.3 Oo Puang Allataala, kamaseinaꞌ, sabaꞌ tattaꞌ-Kiꞌ mangpakamojaꞌ,
taꞌdeii to dosakuꞌ, sabaꞌ mamase tongan-Kiꞌ.
4 Dampangannaꞌ jio mai sininna kagajatan kupugauk,
paccingnginaꞌ jio mai dosakuꞌ.
5 Nasabaꞌ kuakui kumua nang salanaꞌ,
na kunawa-nawa tarruh bang to dosakuꞌ.
6 b Oo Puang Allataala, lako manda Kitaꞌ kunii madosa,
sabaꞌ kupugauk to Tasanga gajaꞌ.
Iamo joo teꞌda nasala ke Tasessanaꞌ,
na tongan kumua maruruh to pangraꞌtah-Taꞌ.
7 Sitonganna mellao jionapa mai tongkumaneꞌ dijajian, na nang tokasalanmoꞌ,
namaneꞌ diparibaꞌtangnaꞌ na nang madosamoꞌ.
8 Sitonganna kuissen kumua Taangah to kamarurusan penawa,
Taajahhimoꞌ kumacca.
9 Pamaceronaꞌ jio mai dosakuꞌ kumacero,
paccingnginaꞌ kulaꞌbi mabusa na kapah.
10 Akeꞌmo kusaꞌdingngi to kareba mangpamario kumua Tapaccingngimoꞌ,
na ia tee penawangkuꞌ to Tapamasussa la memmasannang.
11 Pabokoꞌimi penawa to dosakuꞌ
taꞌdeimi to sininna kasalankuꞌ.
12 Oo Puang Allataala, paccingngii to penawangkuꞌ,
baruii mpake kuasan-Taꞌ kumasumangaꞌ.
13 Danggiꞌ ulaꞌinaꞌ jio mai olo-Taꞌ,
danggiꞌ too Taalaii to Roh malaꞌbih-Taꞌ llan mai penawangkuꞌ.
14 Tapamario poleꞌmoꞌ susi ton-Tapasalamaꞌnaꞌ.
Pamacanning atinaꞌ nturuꞌ-Kiꞌ,
15 kuwaꞌding mpangngajaranni to pakkaeloran-Taꞌ lako tomadosa,
namatappaꞌ poleꞌ lako Kitaꞌ.
16 Oo Puang Allataala Tomangpasalamaꞌkuꞌ, laꞌparannaꞌ jio mai dosa papatean,
kumasannang mpangpeissenanni to kamarurusan-Taꞌ.
17 Oo Puang Allataala, pamaringnganmi to timungkuꞌ,
kuwaꞌding mpangpeissenanni to kamalaꞌbiran-Taꞌ.
18 Nasabaꞌ teꞌda Tapumasannangngi to karoba panggereꞌ,
na moi mpassompannaꞌ karoba pantunu,
nang teꞌda too Talangkabudaii.
19 Oo Puang Allataala, ia to pangkaroba Tapumasannang to Tatarima,
iara to tompenassanni dosana namengkatobaꞌ.
20 Dennaa upaꞌ Tapugaukki to kameloan lako Sion,
Tapakeꞌdeh poleꞌmi temboꞌna kota Yerusalem.
21 Ia ke susimi joo, masannangmi-Kiꞌ ntarimai to karoba sipatoꞌna, karoba pantunu sola karoba ditunu lebu,
iamo joo napangkarobanni tau to sapin muane jao ngenan pangkaroban-Taꞌ.