Passompa tongan na melo
50
Kelongna Asaf.Puang Allataala to makuasa metamba,
ntambai sininna tolino,
mangpamula jio mai kadellekan ratu tama kalambunan.
2 Jao mai Sion, kota to kaminang makassing na malaꞌbih
nanii ratu Puang Allataala mangngarrang na cumbiaꞌ-biaꞌ.
3 Ratui Puang Allataala to tasompa, na nang la den Napugauk.
Najoloan-Ni api cullepaꞌ-lepaꞌ,
naguririkki-I angin baraꞌ tonggo.
4 Natambaii to langiꞌ sola lino
menjaji saꞌbi ke rraꞌtah-Hi kara-karana ummaꞌ-Na.
5 Nakua mangkada, “Pasirempunni to sininna ummaꞌ-Kuꞌ, to mangka Kusijanjian,
napaassahhi karoba panggereꞌ lako Akuꞌ.”
6 Napangpeissenanni langiꞌ kumua maruruh to Puang Allataala
na Ia-ia to rraꞌtah kara-karana ummaꞌ-Na.
7 “Ee ummaꞌ-Kuꞌ, pesaꞌdingngii, la mangkada-Naꞌ.
Ee kamuꞌ to-Israel, la Kupauan kamuꞌ salami,
Akuꞌmo Puang Allataala to misompa.
8 Tangngiara pangkarobanmi Kupasala kamuꞌ,
ia to karoba pantunummi, tuli den jio olo-Kuꞌ.
9 Tangngiara Kuparallui to sapinmi, to diala llan mai bontongna,
iarika beke pangrewami,
10 sabaꞌ ia to sininna olok-olok llan pangngala
na patuoan jao massaꞌbu-saꞌbu buntu,
apang-Kuꞌ ngasan.
11 Sininna manuk-manuk jao buntu, Kuissen ngasan,
na sininna to makkenyawa jio padang, apang-Kuꞌ ngasan.
12 Ia ke la tangbarah-Naꞌ, teꞌda Kuparallu mpauan kamuꞌ,
sabaꞌ ia tee lino sola sininna issinna, Akuꞌ ngasan mpuapai.
13 Teꞌda Kukande jukuꞌ sapin muane,
teꞌda too Kuisoꞌ rara beke buloloꞌ.
14 Iara Kukabudai to passompa pangsukkuruꞌmi,
mipugaukki to tinjaꞌmi lako Akuꞌ Puang Allataala to njaoanni sininna dewata.
15 Metaꞌda tulung kamuꞌ lako Akuꞌ ke masussa kamuꞌ,
Kutulung kamuꞌ, mipakalaꞌbih-Naꞌ.”
16 Apa lako togajaꞌ, Nakua Puang Allataala,
“Teꞌda musipatoꞌ mpaui to parenta-Kuꞌ,
sola ncuritai to janjing-Kuꞌ,
17 sabaꞌ ciaꞌko ntarimai ke Kuajahhiko
na ciaꞌ tooko nturuꞌ kadang-Kuꞌ.
18 Ia ke ngkitako tau boko, male todako boko,
mukabudai siamaꞌ tomanggauk sala.
19 Kada gajaꞌ manda messun jio timummu,
musadia bang la majekkong.
20 Mukada-kadai to sileꞌtomu,
mupau sala bangngi to sangsuranmu.
21 Ia ngasanmo joo to mupugauk, apa kammaꞌ bang-Naꞌ ngkitako,
musangai kumua susikiꞌ.
Apa la Kukara-karako,
Kupamanassa ngasanni joo sininna kasalanmu.
22 Ee, kamuꞌ to tangningaranmo Puang Allataala, parinawai,
Kusessa aa kamuꞌ
na teꞌda tau mpasalamaꞌ kamuꞌ.
23 Ia to tompassompan pangsukkuruꞌ,
iamo mpakalaꞌbih-Naꞌ.
Ia to tomaruruh penawanna,
iamo la ngkita kasalamatan jio mai Akuꞌ Puang Allataala.”