Teꞌda buaꞌna to mpattuan kasugiran
49
Dipatuju lako tomangpalunna tomakkelong. Kelongna batiꞌ Korah.2 Ee sininna bangsa, pesaꞌdingngii!
Ee sininna tolino, patananni talingammi,
3 la tobiasa baꞌtu todianggaꞌ,
la tokaasi-asi baꞌtu tosugih.
4 La mpaunaꞌ kamaccan,
na ia to kupikkiriꞌ iamo to la mpamapahang tau.
5 La mpatanannaꞌ talingangkuꞌ mpesaꞌdingngii kada pangpangngajah,
kupau kada pangpasusian kumukkun mpannoni cuꞌbekan.
6 Teꞌda kumalajaꞌ ke masussanaꞌ
ke natalimbungnaꞌ ewa tomangpanggaukan gajaꞌ,
7 to mpattuan kasugiranna,
na mpumatampo barang makeangga'na.
8 Sitonganna moi mesaꞌ tau teꞌda ngkullei laꞌbak sileꞌtona,
iarika mben pelaꞌbak sungaꞌna lako Puang Allataala.
9 Moi apa dipanglaꞌbakan sungaꞌ teꞌda nasianggaran,
sabaꞌ gaja suliꞌ to pelaꞌbak sungaꞌ,
10 dikua nadanggiꞌ namate
nawaꞌding tuo tarruh teꞌda anggena.
11 Sininna tau la mate ngasan,
la tomacca iarika tobangoꞌ baꞌtu totangpaissen la ancuruꞌ ngasan.
Nasalaii to kasugiranna naputawai tau laen.
12 Moi na buda padang naampui tonna tuopa,
nang la tattaꞌi jiong lamunan
na iamo ngenan nanii torro teꞌda anggena.
13 Moi umbo susi sugihna to tolino teꞌda nalatuo tarruh,
susi unai olok-olok, nang la mate.
14 Susimi joo cappaꞌ katuoanna to tompattuan kalena,
moi too to torrannuan kadanna.
15 Susii to domba nang la dipatei,
narewaii kamatean.
Makaleꞌ unapa nataloimi tomaruruh,
ia to batang kalena, taꞌpa la buruk llan lino tomate,
na teꞌdamo nasikita bola ballona.
16 Apa Puang Allataala la mpasalamaꞌnaꞌ jio mai kuasa kamatean,
sabaꞌ la Naruiꞌnaꞌ jiong mai lino tomate.
17 Danggiꞌ masere ati ke takitai to tosugih
to sabuda-budanna kasugiranna llan bolana,
18 a sabaꞌ ia ke matei, teꞌda apa la nabawa,
teꞌda nalannulaꞌi kasugiranna doꞌ lamunan.
19 Moi namasannang katuoanna llan lino,
napuji-pujii tau to apa napugauk,
20 nang la malei nturuꞌ tojolona,
nateꞌda lalomo nalasikita masiang.
21 Moi umbo susi sugihna to tolino apa teꞌda namapahang,
susii olok-olok teꞌda apa naissen, na nang la lanynyaꞌ.