Puang Allataala liwaꞌ makuasa na malaꞌbih
47
Dipatuju lako tomangpalunna tomakkelong. Kelongna batiꞌ Korah.2 Ee sininna bangsa, massalaꞌpa-laꞌpa kamuꞌ.
Sigumalasian kamuꞌ mario, mpakalaꞌbih Puang Allataala.
3 Nasabaꞌ Puang Allataala to njaoanni sininna dewata na teꞌda ssusianni,
Iamo Raja malaꞌbih to ngkuasai lino.
4 Ia mbenkiꞌ kapataloan tataloi to sininna bangsa,
Nabenkiꞌ kuasa mparenta sininna bangsa.
5 Napileankiꞌ tana tapumanahhi
to tapumasannang tee kitaꞌ batiꞌna Yakub to-Napakamojaꞌ.
6 Endekmi deꞌ ngenan malaꞌbih-Na Puang Allataala,
naturuꞌi tau mario-rio sigumalasian na mpannoni too tarompeꞌ.
7 Pakkelonganni kelong pangpujian to Puang Allataala,
Pakkelonganni kelong pangpujian to Rajataꞌ.
8 Nasabaꞌ Ia to Puang Allataala Iamo Rajana sininna lino,
pakalaꞌbih-Hi mpukelong kelong pangpangngajah.
9 Jaomi kadera malaꞌbih-Na Puang Allataala,
na mparenta sininna bangsa.
10 Sirempunmi to tomangparentana sininna bangsa,
menjaji ummaꞌ-Na Puang Allataala to nasompa Nabi Ibrahim.
Puang Allataala ngkuasai sininna tomakuasa llan lino,
Puang Allataala liwaꞌ makuasa na malaꞌbih.