Puang Allataala ntulungkiꞌ
46
Dipatuju lako tomangpalunna tomakkelong, nturuꞌ kelong Alamot. Kelongna batiꞌ Korah.2 Puang Allataala pentilendungantaꞌ sola kamawatangantaꞌ.
Sadia bang ntulungkiꞌ llan kamasussantaꞌ.
3 Iamo joo na teꞌda tamalajaꞌ, moi na matonggo to nino,
naroꞌpok buntu doꞌ tasik mandalan,
4 moi na tilulun-lulun to ombaꞌ tonggo jiong tasik,
mpatiroge buntu.
5 Den salu lolong to mpamasannang totorro llan kota-Na Puang Allataala.
Iamo to kota malaꞌbih Nanii mariꞌpih Puang Allataala to njaoanni sininna dewata.
6 Teꞌda nalanynyaꞌ joo kota, sabaꞌ nanii torro Puang Allataala.
Puang Allataala ntulungngi ke la mariwangmi.
7 Ia tonna menggalugu gamaran-Na Puang Allataala,
buda bangsa marongka,a
naancuruꞌ karajaanna, naancuruꞌ to lino.
8 Puang Allataala to makuasa nnampaikiꞌ,
Puang Allataala to nasompa Yakub, butung buntu batu tanii mentilendung.
9 Kitai, sininna to Napugauk Puang Allataala llan lino,
liwaꞌ mejangngaran.
10 Napapajai to kasirarian llan lino,
Naleꞌto-leꞌtoi to pana sola doke,
Natunui api to perisai dipake mentilendung.
11 Mangkada-I Puang Allataala Nakua, “Soroꞌii sirari,
la miissen kumua, Akuꞌmo Puang Allataala,
malaꞌbih llan allaꞌna sininna bangsa,
malaꞌbih llan lino.”
12 Puang Allataala to makuasa nnampaikiꞌ,
Puang Allataala to nasompa Yakub,
butung buntu batu tanii mentilendung.