Passambajangna bangsa to dipandasa
44
Dipatuju lako tomangpalunna tomakkelong. Kelongna batiꞌ Korah. Kelong pangpangngajah.2 Oo Puang Allataala, kisaꞌding kalenamo to curita,
jio mai tojolokiꞌ,
to apa liwaꞌ mejangngaran Tapugauk lako tojolokiꞌ
tonna anuꞌ.
3 Kuasan-Taꞌ Taulaꞌii to bangsa laen
nadaꞌtan mariꞌpih to ummaꞌ-Taꞌ jio tana Israel.
Ia to bangsa laen, Tasessa,
apa ia to ummaꞌ-Taꞌ Taben katuoan melo.
4 Tangngia la'boh lando napake nnalai joo padang,
tangngia too kamawatanganna napatalo,
apa tattaꞌ-Kiꞌ ssolanni na kamakuasan-Taꞌ napatalo,
sabaꞌ liwaꞌ Tapakamojaꞌ to ummaꞌ-Taꞌ.
5 Oo Puang Allataala to kusompa, Kitaꞌmo Rajakuꞌ
to mben kapataloan lako ummaꞌ-Taꞌ.
6 Kuasan-Taꞌra kiwaꞌding ntaloi ewakiꞌ,
pangtulung-Taꞌra nasimatean to torrarikan.
7 Nasabaꞌ teꞌda kisattuan panakiꞌ,
moi paꞌdangkiꞌ tangngia la mpasalamaꞌkan.
8 Apa Kitaꞌmo to mpupatalokan jio mai ewakiꞌ,
na ia to tongkabaꞌcikan Tapupemmasiriꞌ.
9 Iamo joo kitattaꞌ mpakalaꞌbih-Kiꞌ
kimangkurru sumangaꞌ tarruh lako Kitaꞌ.
10 Apa ia too,
Tasalaimokan Taelorankan ditalo.
Teꞌdamo Tasolankan ke malekan parari.
11 Tapupangngelohnakan mpalaian kalekiꞌ jio mai ewakiꞌ,
na ia to kasugirankiꞌ naala bang to tongkabaꞌcikan.
12 Tapangngolokan butung domba la digereꞌ,
Tapasisarak-sarakkan, Tapangngolo lako sininna bangsa.
13 Ia tee kamiꞌ ummaꞌ-Taꞌ Tabaluk sempo lako ewakiꞌ napukaunankan
na apara saro-Taꞌ joo?
14 Tapupangngelohnai to bangsa laen ncapaꞌ-capaꞌkan,
napelleꞌkan sola napetawa-tawaikan bangsa bali kampongkiꞌ.
15 Tapupangngelohnakan nacurita gajaꞌ,
na nniling-iling ncapaꞌkan.
16 Pamula makaleꞌ ratu lako karuen nacaccanaꞌ,
na gaja kupumasiriꞌ,
17 sabaꞌ ssaꞌdingnaꞌ kada pangpelleꞌna ewakiꞌ
sola kada pangcapaꞌna to tomapaꞌdik penawa mangpabalahhi.
18 Ia ngasanmo joo kiperasai,
apa teꞌda lalo kitangningaran-Kiꞌ
baꞌtu kipabokoꞌi penawa to janjin-Taꞌ.
19 Teꞌda kipabokoꞌi-Kiꞌ penawa
na ia to parenta-Taꞌ, tattaꞌ kipugauk.
20 Apa ia ton-Taancuruꞌkan memmakarorrongmi to ngenan kinii torro nabutung to menjajimi ngenan asu lampung,
susi to Tapatorrokan jiong lino tomate Tapasamboikan kamalillinan.
21 Ia kengkilampajaii massompa lako Puang Allataala,
kimassompa lako dewata,
22 nang la Naissen Puang Allataala,
sabaꞌ Natarruh to penawa.
23 a Allo-allomokan la dipatei dipasusikan domba la digereꞌ,
sabaꞌ menturuꞌkan lako Kitaꞌ.
24 Oo Puang Allataala, Tatulungmokan, danggiꞌ Tasusi tomammaꞌ bang.
Madoiꞌmi-Kiꞌ ntulungkan danggiꞌ Tasalai tarruhkan.
25 Ciapari Tamembuni
na teꞌda Taingaranni kumua maparriꞌkan sola masussakan?
26 Silentenanmokan jiong litak,
na tangkikullemi keꞌdeh, ditalomokan.
27 Parinawamokan Tatulungkan,
Tapasalamaꞌkan, sabaꞌ tattaꞌ-Kiꞌ mangpakamojaꞌ.