Suraꞌ mangpenduan:
Zabur 42–72
Tomamaliꞌ lako Puang Allataala
42
Dipatuju lako tomangpalunna tomakkelong. Kelong pangpangngajahna batiꞌna Korah.2 Oo Puang Allataala, liwaꞌnaꞌ ngkamaliꞌ-Kiꞌ,
butung jonga mawakke nnangah wai salu.
3 Ngkamaliꞌnaꞌ Puang Allataala to tuo,
gaja doangnaꞌ mangngolo lako olo-Na jio Bola-Na.
4 Allo-bonginaꞌ kumarrak,
susi to kumua wai matangkuꞌ mandamo kuputuo.
Allo-allonaꞌ nakutanai ewakuꞌ kumua,
“Umbomira to Puang Allataala musompa ntulungko?”
5 Gaja masse penawangkuꞌ ke kuingaranni to puramo,
ke mangngujunaꞌ lako Bola Puang Allataala
sola buda tau to mpugauk pangramean.
Akuꞌ njoloan tau lumingka
nasigumalasian na mpukelong too kelong pangpujian.
6 Ciapari kumasse bang natangrapaꞌ penawangkuꞌ?
La rannuanraꞌ Puang Allataala!
La mangsukkuruꞌ omoꞌ lako Puang Allataala to kusompa.
Iamo Puang Allataala to mpasalamaꞌnaꞌ.
7-8 Gaja masse penawangkuꞌ,
iamo joo kuingaran-Kiꞌ.
Nabawanaꞌ masse penawangkuꞌ,
susi to nabawa wai buda,
nasamboinaꞌ kapussakan susi oni wai mentalanda jio Saꞌdan Yordan
lolong jao mai Buntu Hermon sola Buntu Mizar.
9 Dennaa upaꞌ Napakitannaꞌ pangpakamojaꞌ-Na Puang Allataala ke alloi,
kuwaꞌding mpukelong kelong passambajang ke bongii
lako Puang Allataala, to mpatuonaꞌ.
10 Mekutananaꞌ lako Puang Allataala, Tokupubuntu batu llendungnginaꞌ kumua,
“Ciapari na teꞌda Taingarannaꞌ?
Ciapari kumapaꞌdik tarruh,
napandasa ewakuꞌ?”
11 Gaja paꞌdik penawangkuꞌ, nacapaꞌ-capaꞌ ewakuꞌ.
Namekutana tarruh nakua, “Umbomira to Puang Allataala musompa ntulungko?”
12 Ciapari kumasse bang natangrapaꞌ penawangkuꞌ?
La rannuanraꞌ Puang Allataala!
La mangsukkuruꞌ omoꞌ lako Puang Allataala to kusompa.
Iamo Puang Allataala to mpasalamaꞌnaꞌ.