Passambajang llan kamasussan na kelong pangpujian
22
Dipatuju lako tomangpalunna tomakkelong. Nturuꞌ kelong to disanga “Jonga ke makaleꞌi”. Kelongna Raja Daud.2 aOo Puangkuꞌ, Puang Allataala to kusompa,
ciapari Tasalainaꞌ?
Metaꞌda tulungnaꞌ, apa susi to kumua gaja bela-Kiꞌ,
na teꞌda too Tatulungnaꞌ.
3 Oo Puang Allataala to kusompa,
metaꞌda tulungnaꞌ ke alloi,
apa teꞌda Tatulungnaꞌ.
Massambajangnaꞌ ke bongii,
apa teꞌda too kumatana.
4 Na sitonganna Kitaꞌmo Raja gaja malaꞌbih,
to napuji napakalaꞌbih to-Israel.
5 Kitaꞌ nanii matappaꞌ to tojolokiꞌ,
Matappaꞌi Tapasalamaꞌi.
6 Metaꞌda tulungngi lako Kitaꞌ Tapasalamaꞌi,
Kitaꞌ nanii mangrannuan na teꞌda nakacele.
7 Apa ia tee akuꞌ susi to tangngiamoꞌ tau,
susimoraꞌ kalindoro disilese-lesei, teꞌda anggaꞌna,
dipelleꞌnaꞌ sola tangnaanggaꞌnaꞌ tobuda.
8 b Sininna to tokusitammuan ncapaꞌ-capaꞌnaꞌ,
nacumbelleꞌinaꞌ
na nniling-iling ngkitanaꞌ.
9 c Mangkadai nakua, “Rrannuanni Puang Allataala,
akeꞌmo Napasalamaꞌi,
akeꞌmo Natulungngi
ke Nakamasei unai.”
10 Pangtulung-Taꞌ kujaji rampaꞌ,
kumanyaman too naparakai indokuꞌ.
11 Simulangkuꞌ tirik llan ngenan taunna indokuꞌ,
Kitaꞌmo Puang Allataala to kusompa.
Simulangkuꞌ jaji, Kitaꞌ mpattantui to lalan katuoankuꞌ.
12 Oo Puang Allataala, danggiꞌ Tasalainaꞌ,
sabaꞌ ia to ewakuꞌ mandoppiꞌmi la ncilakainaꞌ,
nateꞌda tau la ntulungnaꞌ.
13 Natalimbungnaꞌ ewakuꞌ susi sangbuanan sapin muane
susii sapin dilambah jio tana Basan ntalimbungnaꞌ.
14 La nacilakainaꞌ,
susi singa mburrung mukkun ntame-tame peattana.
15 Teꞌdamo kamaukuankuꞌ susimi wai cappuꞌ tiballu,
sininna lesoankuꞌ sisarakmi,
malammami to penawangkuꞌ
arannai teꞌdamo kabaraniankuꞌ.
16 Teꞌdamo kamaukuankuꞌ susimi tiꞌpekan kurin litak,
na ia to lilakuꞌ leꞌkeꞌmi jao langiꞌ-langiꞌkuꞌ.
Oo Puang Allataala, butung to Tapatorromoꞌ jao bungin,
Taelorannaꞌ mate.
17 Natalimbungnaꞌ tomangpanggaukan gajaꞌ,
nakalibuꞌbunaꞌ susi sangbuanan asu.
Natossokki to limangkuꞌ sola ajekuꞌ.
18 Susi to bukungkuꞌ mandamo nabukkuꞌ balulang,
nasikita-kitainaꞌ ewakuꞌ napakapisinaꞌ.
19 d Natawa-tawai to pakeankuꞌ,
naloterei tooi to baju landokuꞌ.
20 Oo Puang Allataala, danggiꞌ Tasalainaꞌ,
madoiꞌ-Kiꞌ ntulungnaꞌ,
sabaꞌ Kitaꞌmo kupumawatang.
21 Laꞌparannaꞌ jio mai ewakuꞌ to la mpaꞌdangnginaꞌ,
pasalamaꞌnaꞌ jio mai joo tau to susi asu llimbuinaꞌ.
22 Laꞌparanmoꞌ jio mai ewakuꞌ to maparrang susi singa,
na mawatang susi sapin lampung.
Tapasalamaꞌmoꞌ!
23 e La kupangpeissenan lako sininna sileꞌtokuꞌ to panggaukan-Taꞌ,
la kupuji kupakalaꞌbih-Kiꞌ llan kasirempunan ummaꞌ-Taꞌ.
24 Ee sininna to tongkalajaꞌ-ngkasiriꞌ Puang Allataala, puji-I!
Ee kamuꞌ batiꞌna Yakub, pakalaꞌbih-Hi!
Ee kamuꞌ batiꞌna Israel, sompa-I to Puang Allataala!
25 Nasabaꞌ teꞌda Nakita majiongngi to tomaparriꞌ,
teꞌda Nakita teꞌdai anggaꞌna to tomasussa,
teꞌda Napabokoꞌii penawa to tomaparriꞌ,
apa Napesaꞌdingngi ke metaꞌda tulungngi.
26 Kupakalaꞌbih-Kiꞌ jio kasirempunan tomatappaꞌ to liwaꞌ buda,
sabaꞌ sininna to mangka Tapugauk.
La mpassompannaꞌ karoba mpaliu tinjaꞌkuꞌ jio olona tongkalajaꞌ-ngkasiriꞌ-Kiꞌ.
27 Nakumande to tokaasi-asi sabarahna
na sininna tomatappaꞌ la mpakalaꞌbih Puang Allataala.
Dennaa upaꞌ mimasannang tarruh teꞌda anggena.
28 Sininna bangsa la mangngingaran lako Puang Allataala namengkatobaꞌ
nasujuꞌ ssompa-I.
29 Nasabaꞌ Puang Allataala to makuasa,
Ia mparenta sininna bangsa.
30 Ia to tomatampo la sujuꞌ ngasan jio olo-Na.
Puang Allataala la nasompa sininna tolino to teꞌda nalatuo tarruh.
31 Moi anak ampona la massompa too lako Puang Allataala,
napangpeissenan-Ni to Puang Allataala lako batiꞌ sitarruhna.
32 Napangpeissenan tooi lako bangsa laen to maneꞌ la den ke anuꞌ,
kumua mangkami Puang Allataala mpasalamaꞌ ummaꞌ-Na.