Kelong kapataloanna raja
21
Dipatuju lako tomangpalunna tomakkelong. Kelongna Raja Daud.2 Oo Puang Allataala, marioi raja
sabaꞌ Kitaꞌmo mangka mpamawatangngi,
masannangngi
sabaꞌ Kitaꞌ mbenni kapataloan.
3 Mangkami Taben to apa nakadoangngi,
Tabenmi to napetaꞌda.
4 Mangkami Taben barakkaꞌ liwaꞌ buda,
Tapasongkoꞌii mahkota bulawan massanga.
5 Mpetaꞌdai katuoan lako Kitaꞌ, Tabenni,
Tapamalambeh sungaꞌi teꞌda anggena.
6 Namenjaji toditaratteꞌ, sabaꞌ pangtulung-Taꞌ.
Kitaꞌ mpupenjajii tokaissenan namalaꞌbih namatongko.
7 Kitaꞌ mbarakkaꞌi tarruhhi,
napumasannangngi, sabaꞌ tattaꞌ-Kiꞌ
nnampaii.
8 Matappaꞌi raja lako Puang Allataala to njaoanni sininna dewata,
tattaꞌi melo kaparentanna,
sabaꞌ tattaꞌi Nakamasei Puang Allataala.
9 La najokko ngasan to ewana,
napandasai to tongkabaꞌci Puang Allataala.
10 Ratui susi api murruk, la ssolanganni.
Kamabirisan-Na Puang Allataala la llanynyaꞌii,
nacappuꞌ nakande api.
11 Teꞌdamo batiꞌna Taajan,
cappuꞌ ngasanmi ratu lako anak ampona.
12 Ia ke mangngattai nnewa raja,
teꞌda nalajaji akkatta gajaꞌna.
13 Ia ke la Tapanai joo tau,
pole bokoꞌi sipalaian.
14 Oo Puang Allataala, kipakalaꞌbih-Kiꞌ,
sabaꞌ liwaꞌ kamakuasan-Taꞌ,
kimakkelong mpuji-Kiꞌ,
sabaꞌ kamawatangan-Taꞌ.