Passambajang mpetaꞌdan kapataloan raja
20
Dipatuju lako tomangpalunna tomakkelong. Kelongna Raja Daud.Passambajang nadipapatalo to raja
2 Dennaa upaꞌ Napasalamaꞌko Puang Allataala ke llanko kamasussan.
Dennaa upaꞌ na kuasan-Na Puang Allataala to nasompa Yakub, llendungngiko.
3 Dennaa upaꞌ Natulungko Puang Allataala jao mai bola malaꞌbih-Na,
Natulungko jao mai Buntu Sion.a
4 Dennaa upaꞌ Naingaran ngasanni Puang Allataala to passompamu,
dennaa upaꞌ Napumasannangngi to sininna karoba pantunummu.
5 Dennaa upaꞌ Nabenko Puang Allataala sininna to apa mukadoangngi,
dennaa upaꞌ Nabenko kapakullean mpugaukki to sininna akkattamu nakeasseleꞌ.
6 Jaji la siarrakankan mario sabaꞌ kapataloanmu,
kipaendek bandera mpakalaꞌbih Puang Allataala to tasompa.
Dennaa upaꞌ Nabenko Puang Allataala sininna to mupetaꞌda.
Pangngakuan kapataloanna raja
7 Kuissenmi too kumua, Puang Allataala mbenni kapataloan
to raja Napilei.
Kuasan-Na Puang Allataala ntulungngi jao mai suruga ngenan malaꞌbih-Na,
napatalo joo raja.
8 Den tau to ssattuan kareta kapararianna,
den too to ssattuan nyarangna,
apa ia to kitaꞌ,
ssattuankiꞌ kuasan-Na Puang Allataala to tasompa.
9 Ia joo tau titodo na melontin,
apa ia to kitaꞌ tattaꞌkiꞌ mawatang keꞌdeh.
10 Oo Puang Allataala, benni kapataloan to raja,
pebalikan ke metaꞌda tulungkan.