Kamalaꞌbiran-Na Puang Allataala pajan jio to Napaden sola llan atoran-Na
19
Dipatuju lako tomangpalunna tomakkelong. Kelongna Raja Daud.Kamalaꞌbiran-Na Puang Allataala dikita jio to Napaden
2 Langiꞌ mpauankiꞌ kamalaꞌbiran-Na Puang Allataala
sola mpaissennikiꞌ panggaraga liman-Na.
3 Allo-allo, waꞌdingkiꞌ ngkitai matumba kamalaꞌbiran-Na,
na bongi-bongi, waꞌding omikiꞌ nnissen matumba kamakuasan-Na.
4 Moi teꞌda namenggamara
baꞌtu mangkada susi tolino,
5 aapa ia to kamalaꞌbiran-Na Puang Allataala
kaissenan ratu lako randan langiꞌ.
Napadenanni Puang Allataala ngenan to mataallo jao langiꞌ.
6 Ianna makaleꞌ omo, messunmi llan mai ngenanna namangngarrang,
susi tobotting muane mario messun llan mai kamaraꞌna,
susi pangbarani masannang la mpamula kalingkanna.
7 Lumingkai jao langiꞌ jio mai kadellekan ratu tama kalambunan,
nateꞌda apa lesseꞌ jio mai kamalussuanna.
Atoran-Na Puang Allataala
8 Ia to atoran-Na Puang Allataala melo teꞌda caccana,
mpakatana penawa.
Ia to pangpangngajah-Na nang dikatappaꞌi,
na mben kamaccan lako totangpaissenpa.
9 Ia to parenta-Na Puang Allataala teꞌda salana,
na mpamasannang penawa.
Ia joo kadan-Na tongan
na mpamacora pangpikkirisan.
10 Ia to ngkalajaꞌ-ngkasiriꞌ Puang Allataala, malaꞌbih
na dipugauk tarruh teꞌda anggena.
Ia to atoran-Na Puang Allataala tongan
na maruruh ngasan.
11 Ia to atoran-Na laꞌbi makeanggaꞌ na ia to bulawan massang,
laꞌbi macanning na ia to canik teꞌda raunna.
12 Ia joo atoran iamo mpangngingarannaꞌ,
na ia to totattaꞌ mpugaukki, Nabarakkaꞌi Puang Allataala.
13 Teꞌda tau nnissen kasalanna.
Oo Puang, laꞌparannaꞌ jio mai dosa to teꞌda kuanggaiꞌi mpugaukki.
14 Pamabela toonaꞌ jio mai dosa to kuissen kumua sala,
danggiꞌ Taelorannaꞌ disede mpugaukki.
Ia ke susi joo, teꞌda caccakuꞌ,
kulaꞌpah too jio mai kasalan nnewa Puang Allataala.
15 Oo Puang Allataala, Tollendungnginaꞌ, Tollaꞌbaknaꞌ,
dennaa upaꞌ na sininna to kupau sola to llan penawangkuꞌ Tatarima melo.