Kelong kapataloanna Raja Daud
(2 Samuel 22:1-51)
18
Dipatuju lako tomangpalunna tomakkelong. Kelongna Raja Daud, taun-Na Puang Allataala. Ia tonna mangka Puang Allataala mpasalamaꞌ Raja Daud jio mai Saula sola jio mai sininna ewa laenna, mpukelongngi kelong lako Puang Allataala, 2 nakua,“Oo Puang Allataala, to mpamawatangnaꞌ
Kupakamojaꞌ-Kiꞌ.
3 Oo Puang Allataala, Kitaꞌ susi benteng mawatang,
kunii mentilendung,
Kitaꞌ butung buntu batu
nnonganninaꞌ,
Kitaꞌ butung perisaib llendungnginaꞌ,
Kitaꞌ Tompasalamaꞌnaꞌ,
Tajagainaꞌ kudaꞌtan manyaman.
4 Mpematonggoinaꞌ gamarangkuꞌ metaꞌda tulung lako Puang Allataala to sipatoꞌ dipakalaꞌbih,
na Napasalamaꞌnaꞌ jio mai sininna ewakuꞌ.
5 Naguririkkinaꞌ abalaꞌ kamatean,
butung to natallanannaꞌ wai buda.
6 Naguririkkimoꞌ poja kamatean,
jiomi olokuꞌ to kamatean nnadangnaꞌ.
7 Ia tongkullan kapussakan massambajangnaꞌ lako Puang Allataala,
metambanaꞌ metaꞌda tulung lako Puang Allataala to kusompa,
Nasaꞌdingngi to gamarangkuꞌ llan mai bola-Na,
Napesaꞌdingngii to petambakuꞌ metaꞌda tulung.
8 Ninoi natiroge to lino
tirogei to garontoꞌ buntu,
sabaꞌ kamagallian-Na Puang Allataala.
9 Sumarambui to rambu llan mai illong-Na,
Napemburrusanni to api na kuaro api llan mai angaꞌ-Na.
10 Natimbakanni to langiꞌ,
Namellao mpellesei saleuꞌ mapattang,
11 Namentiaꞌ ssakei malaekaꞌ kerubc,
mentiaꞌ-tiaꞌ nabawa angin.
12 Napakalemuꞌi malillin to kale-Na,
naguririkkii saleuꞌ mapattang.
13 Cumbiaꞌmi to palepaꞌ jio olo-Na,
namessun to uran es na kuaro api llan mai saleuꞌ mapattang.
14 Gumalugu-I Puang Allataala to njaoanni sininna dewata,
mpangpesaꞌdingan gamaran-Na jao mai langiꞌ.d
15 Mangpana-I mangrupa palepaꞌ cumbiaꞌ-biaꞌ,
nasisarambuan sipalaian to ewakuꞌ.
16 Napupessuei Puang Allataala to penawan-Na llan mai illong-Na
sabaꞌ kamagallian-Na,
natipangdua to wai tasik,
napajan to garontoꞌ lino.
17 Mpengkoronganni liman-Na Puang Allataala jao mai langiꞌ,
Nalaꞌparannaꞌ jio mai sininna kamasussankuꞌ,
butung to Naruiꞌnaꞌ jiong mai wai mandalan.
18 Napasalamaꞌnaꞌ jio mai ewakuꞌ to liwaꞌ mawatang,
jio mai joo tongkabaꞌcinaꞌ,
sabaꞌ laꞌbi mawatangngi na akuꞌ.
19 Nararinaꞌ ewakuꞌ tongkullan kamaparrisan,
apa Natulungnaꞌ Puang Allataala.
20 Nalaꞌparannaꞌ jio mai abalaꞌ.
Napasalamaꞌnaꞌ,
sabaꞌ gaja Nakabudainaꞌ.
21 Napabalahhi kameloan Puang Allataala to katonganan kupugauk.
Nabarakkaꞌinaꞌ, sabaꞌ teꞌda kupugauk kasalan.
22 Tattaꞌnaꞌ mpugauk parenta-Na Puang Allataala to kusompa,
na teꞌda lalo kupaja ngkatappaꞌi-I.
23 Sininna atoran-Na kuparinawa,
na parenta-Na tattaꞌ kupugauk.
24 Naissen Puang Allataala kumua teꞌda caccakuꞌ,
kuparinawa tongan nadanggiꞌ kupugauk kasalan.
25 Iamo Napabalahhii Puang Allataala kameloan to katonganan kupugauk,
sabaꞌ Naissen kumua teꞌda kukasalan.
26 Oo Puang Allataala, tattaꞌ-Kiꞌ mpugauk janjin-Taꞌ lako to totattaꞌ mpugauk parenta-Taꞌ,
natattaꞌ melo penawan-Taꞌ lako to tomelo penawanna.
27 Maruruh-Kiꞌ lako tomaruruh penawanna,
Tapacukku solohhi to tomajekkong.
28 Tapasalamaꞌ to todipandasa,
apa Tapakasiriꞌ to tomatampo.
29 Oo Puang Allataala to kusompa, Kitaꞌ nnarrangngi katuoankuꞌ,
nateꞌdamo kullan kamalillinan.
30 Tapamawatangnaꞌ nnewa ewakuꞌ,
Tatulungnaꞌ kuwaꞌding mpellaꞌbui temboꞌ.
31 Sukkuꞌ to Napugauk Puang Allataala,
na dikatappaꞌi to janjin-Na.
Susi-I perisai
lako to tomentilendung lako kale-Na.
32 Mesaꞌra to Puang Allataala, teꞌda laenna.
Puang Allataala to tasompa, Ia mandara to susi buntu batu tanii mentilendung.
33 Iamo mpamawatangnaꞌ
Napamanyamanni to katuoankuꞌ,
34 e Napemawatangngi to ajekuꞌ
kuwaꞌding mauku kinjaraꞌ susi jonga,
Napamaukunaꞌ kuwaꞌding jenjen jao buntu,
kusalamaꞌ jio mai ewakuꞌ.
35 Naajahhinaꞌ parari,
kumawatang ruiꞌ ulang pana tambaga.
36 Oo Puang Allataala, Kitaꞌmo susi perisai
llendungnginaꞌ kusalamaꞌ,
kuasan-Taꞌ mpamawatangnaꞌ kutattaꞌ manyaman,
kameloan penawan-Taꞌ mpupenjajinaꞌ tomawatang.
37 Teꞌda Taeloranni to ewakuꞌ njokkonaꞌ,
Tapemawatangngii to ajekuꞌ na teꞌda kutileꞌcu.
38 Kuulaꞌi to ewakuꞌ kujokkoi,
na teꞌda lalo kupole bokoꞌ ke teꞌdapi nacappuꞌ kupatei.
39 Kucappuꞌii kuicak-icak,
nasilentenan mate jio olokuꞌ,
nateꞌdamo mangngewa.
40 Kitaꞌ mbennaꞌ kamawatangan mangrari,
Tapupessujuꞌi jio olokuꞌ to tonnewanaꞌ.
41 Kitaꞌ nnulaꞌii nasipalaian,
kulanynyaꞌii joo tongkabaꞌcinaꞌ.
42 Metambai metaꞌda tulung,
apa teꞌda tontulungngi,
metaꞌda tulung tooi lako Puang Allataala,
apa teꞌda Napebalii.
43 Kupematuꞌtukkii, namaicak susi bungin to napentiaran angin,
kulese-lesei susi lombu jio lalan.
44 Oo Puang Allataala, Kitaꞌ llaꞌparannaꞌ jio mai taungkuꞌ to nnewanaꞌ.
Tabennaꞌ kuasa mparenta buda bangsa,
to tangngia bangsakuꞌ kupukaunanni.
45 Nasujuꞌ jio olokuꞌ,
na ia ke nasaꞌdingngi to parentakuꞌ taꞌpa napugauk.
46 Teꞌdamo kabaranianna,
iamo nasimessunan llan mai ngenan pembunianna simbeꞌberan.
47 Kuissen kumua nang tuo to Puang Allataala.
Dipakalaꞌbih-Hi, sabaꞌ butung buntu batu kunii mentilendung.
Mangsukkuruꞌnaꞌ lako Puang Allataala,
sabaꞌ Napasalamaꞌnaꞌ.
48 Puang Allataala ntulungnaꞌ kutaloii to ewakuꞌ,
Nabennaꞌ kuasa mparenta buda bangsa.
49 Napasalamaꞌnaꞌ jio mai sininna ewakuꞌ.
Oo Puang Allataala, Kitaꞌ mbennaꞌ kapataloan nnewai to tonnewanaꞌ,
Kitaꞌ llaꞌparannaꞌ jio mai tomaparrang.
50 f Iamo kumangsukkuruꞌ lako Kitaꞌ,
nasaꞌdingngi sininna bangsa,
kupukelong kelong pangpujian
mpakalaꞌbih sangan-Taꞌ.
51 Puang Allataala mbenni kapataloan laꞌdaꞌ to raja Napilei.
Tattaꞌ Napakamojaꞌ joo to-Napilei teꞌda anggena,
iamo to Raja Daud sola batiꞌna.”