Passambajangna tomaruruh
17
Passambajangna Raja Daud.Oo Puang Allataala, pesaꞌdingnginaꞌ,
metaꞌdanaꞌ Tapangkadannaꞌ,
parinawai to passambajang lantuk jiong mai penawangkuꞌ.
2 Kamaseinaꞌ, Tapangkadannaꞌ llan kara-karakuꞌ,
sabaꞌ Kitaꞌ nnissenni to katonganan.
3 Ia ke Taparessai to penawangkuꞌ,
moiraka nabongi Taujii,
tantu Taissen kumua maruruh tongannaꞌ.
Teꞌda kada gajaꞌ messun jio timungkuꞌ.
4 Sininna to Tapangparentan lako akuꞌ, iamo kupugauk,
na teꞌda kumasaꞌgaꞌ lako tau.
5 Tuli kupugauk to pakkaeloran-Taꞌ,
teꞌda lalo kulao sala.
6 Oo Puang Allataala, metambanaꞌ metaꞌda tulung,
sabaꞌ Kitaꞌ mpebalinaꞌ.
Parinawanaꞌ,
Tapesaꞌdingngii to petaꞌdangkuꞌ.
7 Dennaa upaꞌ Tapangpekitanni kumua tattaꞌ-Kiꞌ mangpakamojaꞌ.
Ia joo pangpakamojaꞌ-Taꞌ mejangngaran.
Kitaꞌmo mpasalamaꞌ tomentilendung lako kale-Taꞌ,
na teꞌda nakullei ewa ncilakaii.
8 Jagainaꞌ susi to njagai-Kiꞌ liseꞌ matan-Taꞌ,
lendungnginaꞌ susi anak manuk nasamboi paniꞌna indona,
9 angkusalamaꞌ jio mai togajaꞌ to nnewanaꞌ.
Natalimbungnaꞌ ewakuꞌ to madoang mpateinaꞌ.
10 Teꞌda naissenni mangkamase,
naliwaꞌ matampo mangkada.
11 Undi bang nnulaꞌnaꞌ, nakalibuꞌbunaꞌ
namangngatta la mpessambakannaꞌ doꞌ litak.
12 Susii singa mangngatta mangjokko la mangtame-tame,
susii singa malolleꞌ jio ngenan kabunian la mangngadang.
13 Oo Puang Allataala,
ewami to ewakuꞌ Tataloii.
Pasalamaꞌnaꞌ mpake kuasan-Taꞌ
jio mai togajaꞌ to nnewanaꞌ.
14 Pasalamaꞌnaꞌ jio mai tau
to kasugiran lino mandara naparinawa.
Sessami situruꞌ to pangsessa Tapasadianni,
akeꞌ Tasessai to sininna anakkana ratu lako batiꞌna.
15 Apa ia to akuꞌ teꞌda kukasalan,
iamo kuwaꞌding ngkita lindo-Kiꞌ.
Ia ke miꞌcoknaꞌ, liwaꞌnaꞌ mario,
sabaꞌ waꞌdingnaꞌ ngkita-Kiꞌ.