<<    <     Zabur     14     >    >> 
Panggaukan gajaꞌna tolino
14
a Dipatuju lako tomangpalunna tomakkelong. Kelongna Raja Daud.
 
Ia to tomangkada llan penawanna kumua,
“Teꞌda ia to Puang Allataala,” iamo tobangoꞌ.
Ia to panggaukanna liwaꞌ gajaꞌ na mebaꞌcian,
teꞌda laloi to mangpanggaukan melo.
 
2 Nakita Puang Allataala jao mai suruga to tolino,
la nnangah tomacca to ssompa-I.
3 Apa lao sala ngasanmi mpugauk kagajatan,
moi mesaꞌ tau teꞌda mpugauk kameloan.
 
4 Mangkada-I Puang Allataala Nakua,
“Teꞌdaraka namangngingaran to tomangpanggaukan gajaꞌ?
Naalai bang to napunnai ummaꞌ-Kuꞌ
na teꞌda naden nametaꞌda lako Akuꞌ.”
 
5 Gaja napumalajaꞌ to tomangpanggaukan gajaꞌ,
sabaꞌ Nalendungngi Puang Allataala to tomakassing.
6 Nacapaꞌ-capaꞌ tomangpanggaukan gajaꞌ to akkattana tokaasi-asi,
apa Puang Allataala llendungngii.
 
7 Dennaa upaꞌ na Puang Allataala to torro jao Buntu Sion,
mpasalamaꞌ to-Israel.
Ia ke Napemeloi poleꞌmi Puang Allataala to katuoanna batiꞌna Yakub,
la mario-rioib namasannang joo ummaꞌ-Na.