Puang Allataala dinii mentilendung
11
Dipatuju lako tomangpalunna tomakkelong. Kelongna Raja Daud.Puang Allataala kunii mentilendung,
teꞌda buaꞌmi mangkada lako akuꞌ kumua,
“Palaianko kalemu susi manuk-manuk mentiaꞌ deꞌ buntu.”
2 Nasabaꞌ ia to togajaꞌ, napalakoi mata pana to panana,
nagittingngi jio ngenan malillin,
la mpana tomaruruh.
3 Ia ke nagajaꞌ-gajaꞌi tau to atoran llan kampong,
apapara la napugauk tomakassing?
4 Puang Allataala mangparenta jao kadera malaꞌbih-Na,
llan Bola malaꞌbih-Na jao suruga.
Nakita sola Naissen to sininna napugauk tolino.
5 Naparessa Puang Allataala to tomakassing na togajaꞌ,
Nakabaꞌcii to tomasaꞌgaꞌ.
6 Puang Allataala ssessai to togajaꞌ,
Naparatuanni kuaro api sola batu mengkuaroa
susi uran sola angin malussu to mangpamaꞌbong.
7 Nasabaꞌ maruruh Puang Allataala rraꞌtah kara-karana tolino
na teꞌda Namangpasilaenan,
Napakamojaꞌ to tompugauk kameloan.
Ia to tomakassing la torro sola Puang Allataala.