Passambajang mpetaꞌda kamarurusan
10
Oo Puang Allataala, ciapari Tagaja bela,na butung to kumua Tapembuniankan, tongkimperasai kamaparrisan?
2 Kamatampoanna to togajaꞌ mpandasa tarruh tokaasi-asi,
akeꞌ naalai poja pangkabuaꞌna.
3 Ia to togajaꞌ mputendengan akkatta gajaꞌna,
na ia to toraka mpau gajaꞌ sola ntangdoi Puang Allataala.
4 Teꞌda naparinawa Puang Allataala to togajaꞌ.
Kamatampoanna namangpikkiriꞌ kumua teꞌda ia Puang Allataala.
5 Tuli keasseleꞌ to napugauk to togajaꞌ sipaꞌna,
teꞌda naissenni nateꞌda napahangngi to atoran-Na Puang Allataala.
Nacapaꞌ ngasan to ewana.
6 Nakua llan penawanna, “La melo bang to katuoankuꞌ,
teꞌda kulamasussa ratu lako batiꞌkuꞌ.”
7 a Ia to messun jio timunna petangdo manda,
pangnguraga na mpangngando tau,
nakabudai mpau kada to mepaꞌdikan penawa
na ncilakai tau.
8-9 Membunii llan kampong
madoang mpatei toteꞌda salana.
Susi singa membuni llan toꞌ reu makamban,
mmata-matai totangpakulle
la naadang najokkoi nabawai.
10 Kumuku-mukui sadia la njokko tokaasi-asi,
napessambakanni.
11 Mangkadai llan penawanna nakua,
“Teꞌda Naingaranni Puang Allataala,
teꞌda Naparinawai,
na teꞌda tarruh Nalangkitai Puang Allataala
joo tapugauk.”
12 Oo Puang Allataala, sessami to tomangpanggaukan gajaꞌ.
Ingaranni to todipandasa.
13 Ciapari to togajaꞌ nancapaꞌ tarruh Puang Allataala,
namangkada llan penawanna kumua teꞌda Nalassessai Puang Allataala?
14 Apa Kitaꞌ ngkita ngasanni,
Taparinawai to tomasussa sola tomapaꞌdik,
Tatuli sadia ntulungngi.
Na ia to totangpakulle, massorongan lako Kitaꞌ,
Kitaꞌmo tuli ntulungngi.
15 Anggeimi to kuasanna to togajaꞌ sola tokasalan,
sessai sabaꞌ panggaukan gajaꞌna,
dikua napaja mpugauk kagajatan.
16 Puang Allataala mangparenta teꞌda anggena,
sininna bangsa to teꞌda namassompa lako Puang Allataala,
la diulaꞌi jio mai padang-Na.
17 Oo Puang Allataala, Tapesaꞌdingngimo to passambajangna to todipandasa,
na Tapamasumangaꞌmi.
18 Tapangkadanni to kara-karana pea biung sola todipandasa,
dikua napaja to tau mpakalajaꞌi.