Passambajang mangsukkuruꞌ
9
Dipatuju lako tomangpalunna tomakkelong. Nturuꞌ kelong Mut-Laben. Kelongna Raja Daud.2 Oo Puang Allataala, la lantuk tongan penawangkuꞌ mangsukkuruꞌ lako Kitaꞌ.
La kupangpeissenan to sininna panggaragan-Taꞌ to liwaꞌ mejangngaran.
3 Oo Puang Allataala to njaoanni sininna dewata, la mario-rionaꞌ kumasannang,
sabaꞌ sininna panggaragan-Taꞌ.
La mpukelongnaꞌ kelong pangpujian
mpakalaꞌbih sangan-Taꞌ.
4 Ia tonna palai jio mai olo-Taꞌ to ewakuꞌ,
titentai namelolin namate.
5 Mangkami Taraꞌtah to kara-karakuꞌ
Tapangkadannaꞌ kumua teꞌda kusala,
nang Kitaꞌmo to maruruh rraꞌtah kara-kara
jao kadera malaꞌbih-Taꞌ.
6 Kitaꞌ to mangka nggarraꞌ sininna to tossompa dewata,a
Talanynyaꞌii to togajaꞌ.
Taputtaii to sanganna
arannai teꞌdamo tau nningaranni.
7 Laꞌbipa ia to ewakuꞌ,
lanynyaꞌ ngasanmi.
Taancuruꞌi to kotana
na teꞌda lalomo tau nningaranni.
8 Apa ia to Puang Allataala mangparenta tarruh teꞌda anggena,
Nampakeꞌdeh kadera malaꞌbih-Na nanii rraꞌtah kara-karana tolino.
9 Teꞌda Namangpasilaenan mangparenta lako sininna bangsa,
Namaruruh rraꞌtah kara-karana sininna tolino.
10 Puang Allataala butung buntu batu nanii mentilendung todipandasa,
dinii metaꞌda tulung ke llankiꞌ kamasussan.
11 Oo Puang Allataala, ia to tonnissen-Kiꞌ, mangrannuan lako Kitaꞌ,
teꞌda Tapabokoꞌi penawa to tossompa-Kiꞌ.
12 Pakalaꞌbih-Hi Puang Allataala to mangparenta jao Buntu Sionb,
pangpeissenanni to panggaukan malaꞌbih-Na lako sininna bangsa.
13 Naingaran to todipandasa,
tattaꞌ Napesaꞌdingngi to sarrona tomapaꞌdik
Napabalahhii to tompatei tomapaꞌdik.
14 Oo Puang Allataala, kamaseinaꞌ,
kitai napandasa tongannaꞌ ewakuꞌ,
laꞌparannaꞌ jio mai kamatean,
15 kuwaꞌding mpangpeissenanni to sininna panggaukan-Taꞌ liwaꞌ melo
jio olona to-Yerusalem.
La meolinaꞌ masannang,
sabaꞌ Kitaꞌ mpasalamaꞌnaꞌ jio mai kamatean.
16 Ia to totangssompa Puang Allataala
ngkabuaꞌ garuang, na ia ora melolin doꞌ,
nggaraga poja, apa ia ora naala pojana.
17 Mpangpeissenan-Ni kale-Na Puang Allataala,
sabaꞌ maruruh to pangraꞌtah-Na.
Ia to togajaꞌ nacilakaii panggaukanna.
18 Ia to togajaꞌ mangnguju lako ngasan kamatean,
susimi joo to la jaji lako to totangnturuꞌ parenta-Na Puang Allataala.
19 Teꞌda Napupangngelohna tarruhhi Puang Allataala to tokaasi-asi
na teꞌda Nakammaꞌ bang ngkitai to tomakario-rio tomangrannuan lako kale-Na.
20 Oo Puang Allataala, raꞌtahmi kara-karana to sininna bangsa teꞌda namassompa lako Kitaꞌ,
danggiꞌ nalaꞌpah jio mai pangsessa-Taꞌ.
21 Akeꞌ namalajaꞌ lako Kitaꞌ,
naissenni kumua tolinori, to nang la mate.