Puang Allataala maruruh rraꞌtah kara-kara
7
Kelong batingna Raja Daud, to dipukelong lako Puang Allataala sabaꞌ Kus, batiꞌna Benyamin.a2 Oo Puang Allataala to kusompa, Kitaꞌmo kunii mentilendung,
pasalamaꞌnaꞌ jio mai sininna ewakuꞌ to tattaꞌ bang nnulaꞌnaꞌ la ncilakainaꞌ.
3 Danggiꞌ eloranni ncilakainaꞌ, susi singa meatta,
danggiꞌ nagararaknaꞌ namaneꞌ ntame-tamenaꞌ,
na teꞌda to ntulungnaꞌ.
4-5 Oo Puang Allataala to kusompa, ia ke denni kupugauk tangmaruruh lako tolaen,
ia ke denni kupugauk kagajatan lako solakuꞌ,
ia ke masaꞌgaꞌnaꞌ lako ewakuꞌ na teꞌda passabaranna,
6 akeꞌmo naulaꞌnaꞌ ewakuꞌ, najokkonaꞌ nasessanaꞌ,
napatorronaꞌ jio tangnga lalan kuarannai mate.
7 Oo Puang Allataala, keꞌdehmi-Kiꞌ, pangpekitanni to kamagallian-Taꞌ,
ewai to ewakuꞌ to gaja birih lako akuꞌ.
Keꞌdehmi-Kiꞌ mpangkadannaꞌ
sabaꞌ Kitaꞌmo to maruruh rraꞌtah kara-kara tolino.
8 Pasirempunni to sininna bangsa,
Taparentai jao mai kadera malaꞌbih-Taꞌ jao suruga.
9 Oo Puang Allataala, Kitaꞌmo rraꞌtah kara-karana tolino,
ke waꞌdingngi Taraꞌtahhi kumua teꞌda kusala,
sabaꞌ melo panggaukankuꞌ na teꞌda caccakuꞌ.
10 b Taꞌtanmi to togajaꞌ, napajaii mpugauk kagajatan.
Tapamasumangaꞌi to tomakassing,
sabaꞌ Kitaꞌmo Puang Allataala to maruruh
to ntarruh penawa sola pangpikkirisanna tolino.
11 Puang Allataala iamo susi perisai llendungnginaꞌ,
to mpasalamaꞌ tau to maruruh penawanna.
12 Puang Allataala Iamo to mangraꞌtah maruruh,
allo-allo bang waꞌding ssessa tomangpanggaukan gajaꞌ.
13-14 Ia ke teꞌda namengkatobaꞌ to tomadosa,
Napasadianmo Puang Allataala parewa mematean la ssessai.
Ssangeh-Hi la'boh lando,
Napupenjajii api to pana-Na,
Napatuju lakoi tomadosa.
15 Kitami to tomadosa, kagajatan manda llan penawanna,
namangngatta umbo nakua la mpugauk kagajatan sola kamajekkongan.
16 Ngkalianni garuang tau laen,
apa ia bang una melolin doꞌ.
17 Ia to panggaukan gajaꞌna pole lako kalena,
na ia to kamaparranganna ssussai katuoanna.
18 La mangsukkuruꞌnaꞌ lako Puang Allataala,
sabaꞌ maruruh rraꞌtah kara-kara tolino,
la makkelongnaꞌ mpakalaꞌbih Puang Allataala
to njaoanni sininna dewata.