Passambajang ke wattu kamasussan
6
Dipatuju lako tomangpalunna tomakkelong. Dipannonian cuꞌbekan situruꞌ Kelong Mangpengkarua. Kelongna Raja Daud.2 a Oo Puang Allataala, moi Tamabirih, apa danggiꞌ Tasessanaꞌ,
moi magalli-Kiꞌ, apa danggiꞌ Tapandasanaꞌ.
3 Oo Puang Allataala, pakitanmoꞌ kamamasean-Taꞌ, sabaꞌ malammami kalekuꞌ.
Tapamawatangnaꞌ sabaꞌ tangpakullenaꞌ.
4 Oo Puang Allataala, pussak penawangkuꞌ,
pirapara masainna Tanii ssalainaꞌ?
5 Oo Puang Allataala, danggiꞌ Tasalainaꞌ,
pasalamaꞌnaꞌ jio mai kamatean,
sabaꞌ tattaꞌ-Kiꞌ mangpakamojaꞌ.
6 Ia ke matemi to tau, teꞌdamo naingaran-Kiꞌ,
teꞌdamo to la mangsukkuruꞌ lako Kitaꞌ llan lino tomate.
7 Gaja boꞌjoꞌmoꞌ sumarro,
bongi-bonginaꞌ kumarrak jao katindoankuꞌ,
bosokmi allonankuꞌ nalolongngi wai matangkuꞌ.
8 Kambangmi matangkuꞌ namaraun pengkitangkuꞌ kumarrak,
sabaꞌ ewakuꞌ gaja mpaꞌdikki penawangkuꞌ.
9 b Ee sininna tomangpanggaukan gajaꞌ, palai ngasan kamuꞌ,
sabaꞌ Napesaꞌdingngimi Puang Allataala tongkukumarrak metaꞌda tulung.
10 Napesaꞌdingnginaꞌ Puang Allataala tongkumetaꞌda tulung,
na Natarimami to passambajangkuꞌ.
11 Sininna ewakuꞌ sabakan namasiriꞌ
nataꞌpa sorong bokoꞌ ntampun lindona.