Passambajang metaꞌda Naampaikiꞌ Puang Allataala
5
Dipatuju lako tomangpalunna tomakkelong. Dipannonian suling. Kelongna Raja Daud.2 Oo Puang Allataala, metaꞌdanaꞌ Tapesaꞌdingngii tee kadangkuꞌ,
Taparinawai to sarrokuꞌ.
3 Oo Puang Allataala, Rajakuꞌ to kusompa,
pesaꞌdingngii ke metaꞌda tulungnaꞌ,
sabaꞌ lako mandara Kitaꞌ, kunii massambajang.
4 Oo Puang Allataala, pesaꞌdingngii passambajangkuꞌ ke makaleꞌi.
Subu unapa kumassompaa,
kutajan pebalin-Taꞌ.
5 Kitaꞌmo Puang Allataala to ngkabaꞌci sipaꞌ gajaꞌ,
teꞌda Taeloranni to togajaꞌ sipaꞌna mentama bola-Taꞌ.
6 Kitaꞌ mpupamalajaꞌi to tomatampo mangngolo lako Kitaꞌ.
Takabaꞌci ngasan to tau mpugauk kagajatan.
7 Kitaꞌ llanynyasan tomangkada tangtongan.
Takabaꞌci to tomajekkong sola topapatean.
8 Apa ia to akuꞌ liwaꞌnaꞌ Tapakamojaꞌ
kuwaꞌding mentama bola-Taꞌ.
Sujuꞌnaꞌ mennolo lako Ngenan malaꞌbih-Taꞌ
kusompa-Kiꞌ, sabaꞌ kukalajaꞌ kukasiriꞌ-Kiꞌ.
9 Oo Puang Allataala, nasirimpihhinaꞌ ewakuꞌ.
Pakitannaꞌ lalan maruruh to la kuola.
Patujunaꞌ mpugauk pakkaeloran-Taꞌ.
10 b Nasabaꞌ teꞌda nadikatappaꞌi kadanna to ewakuꞌ,
mangngatta bang ssolangan tau.
Ia to kadanna melo bang disaꞌding,
apa mangnguragari to la napumate tau.
11 Oo Puang Allataala, Tasessai,
akeꞌ namacilaka, sabaꞌ akkatta gajaꞌna ia.
Ulaꞌii, sabaꞌ liwaꞌ buda dosana, na naewa-Kiꞌ.
12 Dennaa upaꞌ na ia to torannuan-Kiꞌ mangsukkuruꞌ lako Kitaꞌ
na mario-masannang teꞌda anggena.
Lendungngii to tompakamojaꞌ-Kiꞌ
anna mario, sabaꞌ kameloan penawan-Taꞌ.
13 Nasabaꞌ Kitaꞌmo Puang Allataala to mbarakkaꞌi tomakassing.
Taparakaii situruꞌ pangpakamojaꞌ-Taꞌ.