Passambajang ke bongi
4
Dipatuju lako tomangpalunna tomakkelong. Dipannonian cuꞌbekan. Kelongna Raja Daud.2 Oo Puang Allataala, Kitaꞌmo tompangkadannaꞌ,
pebalii ke metaꞌda tulungnaꞌ.
Pakatananaꞌ ke masussanaꞌ,
kamaseinaꞌ Tapesaꞌdingngii to passambajangkuꞌ.
3 Ee tomakuasa, pirapara masainna la minii mpau gajaꞌnaꞌ?
Pirapara masainna la minii ngkabudai apa tangtongan minnangah to teꞌda buaꞌna?
4 Issenni kumua Puang Allataala mangka mpilean kale-Na
mesaꞌ to-Napakamojaꞌ.
Napesaꞌdingngi Puang Allataala
ke massambajangnaꞌ.
5 a Moi mimabirih,
apa danggiꞌ mipugauk dosa.
Pamatanai penawammi,
mipikkiriꞌ meloi tee pangpangngajahkuꞌ
ke bongii jao katindoan.
6 Matappaꞌ kamuꞌ lako Puang Allataala,
mipassompan karoba situruꞌ atoran-Na.
7 Buda tau mekutana nakua,
“Indara to la mbarakkaꞌikiꞌ?”
Oo Puang Allataala, dennaa upaꞌ Tapakitankan kameloan penawan-Taꞌ.
8 Tabenmoꞌ kamasannangan to gaja kupumasannang
laꞌbipa na ia to kamasannanganna ewakuꞌ ke keasseleꞌi to gandumna sola anggoroꞌna.
9 Ia ke mbambangannaꞌ kalekuꞌ, manyaman mammaꞌkuꞌ,
sabaꞌ Naampainaꞌ Puang Allataala.