Pengkita mangpennappa' jiona karanjang ponno bua-bua
8:1-3
8
Napakitan pole' omo' mesa' pengkita PUANG Allataala. Kukita mesa' karanjang ponno bua matasak. 2 Nakutanaina' Nakua “Ee Amos, apara to mukita?” Kupebali-I kukua, “Ngkitana' mesa' karanjang ponno bua matasak.” Mangkadam-I PUANG Allataala Nakua, “Susi tee bua-bua matasak wattunnami dipebuai, susi toomi joo nadete'mi wattunna la Kusessa to umma'-Ku', cappu'mi kasabbarasan-Ku' nang la Kusessami. 3 Ia joo wattu ia to kelong lan bola passambajangan la menjaji bating, nasaba' umbo-umbo nanii silentenan to batang rabuk naca'bean buni tau.” Susimi joo kadan-Na PUANG Allataala.Pangngingaran lako tomajekkong
8:4-10
4 Mangkadami Amos nakua: Ee mangpesa'ding kamu' to tompakario-rio tokaasi-asi. 5 Mikua lan penawammi, “Piranra ia la mangkanna tee pangramean ba'tu allo katorroan na gaja doangmiki' mbaluk pole' gandum mpake suka' tangtongan ba'tu mpakande dacing? 6 Tabaluk masuli' gandum gaja', taalai to tokaasi-asi tapukaunanni, saba' tangnakulle mbajah indanna, moi na siangga'ra pealli ce'la.”
7 PUANG Allataala to napakala'bih to-Israel mangka massapah Nakua, “Kukua tongan nang la Kuingaran tarruh to panggaukan gaja'na to-Israel! 8 Te'daraka na la mputirogei lino joo panggaukan gaja'na to-Israel, namemmasussa to tau? Te'daraka na la susi Sa'dan Nil to den wattunna naendek na den wattunna namere?” 9 Mangkada-I PUANG Allataala, Nakua, “Ia joo wattu la jajii to bongi'-bongi' ke tangngai allo, susii ke la lambunni to allo. 10 Ia to pangramean kamasannanganmi la Kupupenjaji kamasussan kamatean na ia to kelongmi la menjaji bating. La Kusessa ngasan kamu' mimanggalettung mimangpakean karung tandana kumua masussa kamu'. La susi kamu' to mbatingngi kamateanna anak mesa, arannai ia joo wattu menjaji allo kamasussan to liwa' memassean.”
Kadan-Na Puang Allataala naangah tau
8:11-14
11 Mangkada-I PUANG Allataala, Nakua, “Pesa'dingngii, ia ke nadete'mi wattunna, la mparatu-Na' karorian inde' tana to-Israel, tangngia karorian saba' te'da kande ba'tu te'da wai, apa madoangri to tau ssa'ding kadan-Na PUANG Allataala. 12 Malei llilingngi sininna tana Israel to tau nnangah kadan-Na PUANG Allataala apa te'damo tau mpauanni. 13 Na ia joo wattu moi to ana'dara malolo sola pea muane malolle' na mawatang, limpui nasaba' butung mawakke tangmangiso'. 14 Ia to tau la tibambang ngasanni na te'damo nakullei mi'cok, nasaba' massapah mpau sanganna dewata Asima jio Samaria. Namassapah too nakua, “Nakitana' dewata to tuo jio Dan” ba'tu “Nakitana' dewata to dipakamoja' jio Bersyeba.”