11
Nakaba'ci Puang Allataala to tompakande dacing,apa Nakabudai to tomaruruh mangtimbang.
2 Ia to tomatampo la masiri',
apa ia to tompamajiong penawanna iamo tomacca.
3 Ia to tomaruruh napatuju kamarurusan penawanna,
apa ia to tomajekkong naancuru' kamajekkonganna.
4 Ia ke Kama'mi lino te'damo bua'na to ewanan,
apa ia to tonturu' pakkaeloran-Na Puang Allataala, la salama' jio mai kamatean.
5 Ia to lalan katuoanna tote'da caccana napamarante kamarurusan penawanna,
apa ia to togaja' sipa'na, naancuru' kagajatanna.
6 Ia to tomaruruh penawanna, salama' nasaba' mpugauk pakkaeloran-Na Puang Allataala,
apa ia to totangdikatappa'i, masolang natumang rakana.
7 Ia ke matemi to togaja' sipa'na,
cappa' todami to apa narannuan,
na te'da toomo bua'na to ewanan napattuan.
8 Ia to tomakassing dipasalama' jio mai kamasussan,
nasullei togaja' sipa'na.
9 Ia to kada messun jio timunna tocia' ssompa Puang Allataala ssolangan padanna rupa tau,
apa ia to tomakassing, mpake kapaissenanna mpasalama' kalena.
10 Mario-rio to tau llan kota ke dibarakka'i to tomakassing,
na sipeoli-olian masannang to tau ke matei to togaja' sipa'na.
11 Barakka'na tomaruruh mpaendek tuka' kota,
apa ia to kadanna togaja' sipa'na ssolangan kota.
12 Bango' to tomangkada tangnnangga' padanna rupa tau,
apa ia to tomapahang te'da kada gaja' messun jio timunna.
13 Ia to tomale melako bang mbawa curita
te'da nakullei mbuni kada,
apa ia to todikatappa'i
te'da nalampaui to kada dibuni.
14 Ancuru' to bangsa ke te'dai tomacca mpatujui,
apa ia ke budai tomangpakainga' nang la samanyaman-nyamanna to bangsa.
15 Ia to tomangjanji la mbajaran indanna tau laen ssussai kalena,
apa ia to tocia' mpugaukki susi joo, la manyaman.
16 Ia to baine messipa' melo, kadianggasan to natarima,
apa ia to muane masa'ga' kasugiranra naampa'.
17 Ia to tomamase napumaupa',
apa ia to tomasa'ga' ssessa kalena.
18 Ia to assele' napaden togaja' sipa'na te'da bua'na,
apa ia to assele' napaden tonturu' pakkaeloran-Na Puang Allataala den tarruh bua'na.
19 Ia to totatta' mpugauk pakkaeloran-Na Puang Allataala,
la manyaman katuoanna,
apa ia to tomparri-parri bang mangpanggaukan gaja',
te'da naampa' katuoan jio lino undi.
20 Nakaba'ci Puang Allataala to togaja' bang penawanna,
apa Nakabudai to tote'da caccana.
21 Nang la te'da nala'pah jio mai pangsessa to togaja' sipa'na,
apa ia to bati' tomakassing la salama'.
22 Te'da bua'na to bulawan dicaliccingan bai,
susi toomi to baine malolo apa tangmelo akkalanna.
23 Ia to nakadoangngi to tomakassing mpaden kameloan,
apa ia to nakadoangngi togaja' sipa'na mpaden kamagallian.
24 Den to tomalaboh, apa sasugih-sugihna,
den to tomasekke', apa kannori samakario-riona.
25 Ia to totuli mangpangben la kala'bian,
ia to tongkabudai mangtulung, la ditulung toda.
26 Inda-inda nnanna gandumna la mangbaluk masuli', natangdoi tau,
apa ia to tombaluk gandumna ke wattu diparalluii la dipuji.
27 Inda-inda to mpangngattai mangpanggaukan melo,
la nakabudai tau,
apa ia to tomparri-parri bang mangpanggaukan gaja',
la naratui kamaparrisan.
28 Inda-inda to mpattuan ewananna,
la macilaka,
apa ia to tompugauk pakkaeloran-Na Puang Allataala,
la melo katuoanna susi garonto' kaju mengkacocok naloboh.
29 Inda-inda to ssussai repokkona, la kata'dean sininna to apa keangga',
na ia to tobango' la napukaunan tomacca.
30 Ia to tomakassing la manyaman katuoanna,
ia to tomacca sabuda-budanna tau nturu'i.
31 aIa una to tomakassing nadipabalahhi llan tee lino,
la'bih-la'bih to togaja' sipa'na na tomadosa nang la disessa.